കാവുംമന്ദം: പഠന മുറികളിൽ അത്യാധുനിക പഠന സൗകര്യങ്ങൾ ഒരുക്കി ഹൈടെക് വിദ്യാലയമായി തരിയോട് ജി.എൽ.പി സ്‌കൂൾ. ഡിജിറ്റൽ ക്ലാസ് മുറികളുടെ ഉദ്ഘാടനവും ഗോത്ര വിഭാഗം വിദ്യാർത്ഥികൾക്ക് വിദ്യാകിരണം പദ്ധതിയിൽ ഉൾപ്പെടുത്തി നൽകുന്ന ലാപ്‌ടോപ്പുകളുടെ വിതരണവും അഡ്വ ടി സിദ്ധീഖ് എം.എൽ.എ നിർവഹിച്ചു. പി.ടി.എ പ്രസിഡന്റ് ഷമീം പാറക്കണ്ടി അദ്ധ്യക്ഷത വഹിച്ചു. പ്രീപ്രൈമറി വിദ്യാർത്ഥികൾക്ക് വേണ്ടി ഒരുക്കിയ കളിത്തട്ട് ഗ്രാമപഞ്ചായത്ത് പ്രസിഡന്റ് വി.ജി ഷിബു ഉദ്ഘാടനം ചെയ്തു.
വിവിധ പദ്ധതികളുടെ ഭാഗമായി ലഭിച്ച കമ്പ്യൂട്ടർ അനുബന്ധ ഉപകരണങ്ങൾ മികച്ച ശബ്ദ സംവിധാനങ്ങൾ അടക്കമാണ് ശാസ്ത്രീയമായി ക്ലാസ് മുറികളിൽ ഒരുക്കിയത്. തരിയോട് ഗ്രാമപഞ്ചായത്ത് വൈസ് പ്രസിഡന്റ് സൂന നവീൻ, സ്ഥിരം സമിതി അദ്ധ്യക്ഷൻമാരായ ഷീജ ആന്റണി, രാധ പുലിക്കോട്, മെമ്പർമാരായ ചന്ദ്രൻ മടത്തുവയൽ, ബീന റോബിൻസൺ, പുഷ്പ മനോജ്, സിബിൾ എഡ്വേഡ്, ബ്ലോക്ക് പ്രോഗ്രാം ഓഫീസർ എ.കെ ഷിബു, പി.ടി.എ വൈസ് പ്രസിഡന്റ് സന്തോഷ് കോരംകുളം, എം.പി.ടി.എ പ്രസിഡന്റ് ലീന ബാബു, വൈസ് പ്രസിഡന്റ് രാധിക ശ്രീരാഗ്, സി.സി ഷാലി, എം.പി.കെ ഗിരീഷ്‌കുമാർ തുടങ്ങിയവർ സംസാരിച്ചു. പ്രധാനാദ്ധ്യാപിക പി.കെ റോസിലി സ്വാഗതവും സീനിയർ അസിസ്റ്റന്റ് സി.പി ശശികുമാർ നന്ദിയും പറഞ്ഞു.