ആലപ്പുഴ: ബാങ്ക് എംപ്ലോയീസ് ഫെഡറേഷൻ ഒഫ് ഇന്ത്യയിൽ അഫിലിയേറ്റ് ചെയ്തു പ്രവർത്തിക്കുന്ന കേരള ബാങ്കിലെ സംഘടനകളായ ഡിസ്ട്രിക്ട് കോ- ഓപ്പറേറ്റീവ് ബാങ്ക് എംപ്ലോയീസ് ഫെഡറേഷൻ കേരളയും (ഡി.ബി.ഇ.എഫ്), കേരളാ സ്റ്റേറ്റ് കോ- ഓപ്പറേറ്റീവ് ബാങ്ക് എംപ്ലോയീസ് ഫെഡറേഷനും (കെ.എസ്.സി.ബി.ഇ.എഫ്.) ലയിക്കും. ലയന സമ്മേളനം 8, 9 തീയതികളിൽ ആലപ്പുഴ ടൗൺഹാളിൽ നടക്കുമെന്ന് സ്വാഗതസംഘം ഭാരവാഹികൾ വാർത്തസമ്മേളനത്തിൽ അറിയിച്ചു. 8ന് രാവിലെ 10.15ന് മുഖ്യമന്ത്രി പിണറായി വിജയൻ ലയന സമ്മേളനം ഉദ്ഘാടനം ചെയ്യും. കെ.എസ്.സി.ബി.ഇ.എഫ് പ്രസിഡന്റ് ആനത്തലവട്ടം ആനന്ദൻ അദ്ധ്യക്ഷത വഹിക്കും. ഉച്ചയ്ക്ക് രണ്ടിന് വനിതാ സമ്മേളനം സി.പി.എം സംസ്ഥാന കമ്മിറ്റി അംഗം സി.എസ്. സുജാത ഉദ്ഘാടനം ചെയ്യും. വൈകിട്ട് 4.30ന് സി.ഐ.ടി.യു അഖിലേന്ത്യാ സെക്രട്ടറി കെ. ചന്ദ്രൻപിള്ള ട്രേഡ് യൂണിയൻ പ്രഭാഷണം നടത്തും.9ന് രാവിലെ 9.30ന് ലയനപ്രമേയം. തുടർന്ന് തുർക്കിയിൽ നടന്ന ഏഷ്യൻ പവർ ലിഫ്റ്റിംഗ് ചാമ്പ്യൻഷിപ്പിൽ മെഡൽ നേടിയവരെ മന്ത്രി സജി ചെറിയാൻ ആദരിക്കും. 10.30ന് സഹകരണ സമ്മേളനം മന്ത്രി വി.എൻ. വാസവൻ ഉദ്ഘാടനം ചെയ്യും. എം.സത്യപാലൻ അദ്ധ്യക്ഷത വഹിക്കും. ഉച്ചയ്ക്ക് ഒന്നിന് പുതിയ സംഘടനയുടെ പേര് പ്രഖ്യാപനം, പതാക കൈമാറൽ, മുൻകാല നേതാക്കളെ ആദരിക്കൽ എന്നിവ കടകംപള്ളി സുരേന്ദ്രൻ എം.എൽ.എ നിർവഹിക്കും. സമര സേനാനിയും ഗായികയുമായ പി.കെ. മേദിനിയെ മന്ത്രി പി.പ്രസാദ് ആദരിക്കും. വൈകിട്ട് നാലിന് പുതിയ കമ്മിറ്റിയെ തിരഞ്ഞെടുക്കും. പത്രസമ്മേളനത്തിൽ സ്വാഗതസംഘം വൈസ് ചെയർമാൻ എം.സത്യപാലൻ, ഡി.ബി.ഇ.എഫ്. ജനറൽ സെക്രട്ടറി വി.ബി. പത്മകുമാർ, കെ.എസ്.സി.ബി.ഇ.എഫ്. സംസ്ഥാന കമ്മിറ്റിയംഗം എച്ച്.എച്ച്.ബി.മോഹൻ, സ്വാഗതസംഘം ജനറൽ കൺവീനർ പി.എം.പ്രമോദ് തുടങ്ങിയവർ പരിപാടികൾ വിശദീകരിച്ചു.