ആലപ്പുഴ: ഈ മാസം 23ന് പൾസ് പോളിയോ ഇമ്മ്യൂണൈസേഷൻ പരിപാടിയുടെ ഭാഗമായി ജില്ലയിൽ 130398 കുട്ടികൾക്ക് തുള്ളിമരുന്ന് നൽകും. അന്യസംസ്ഥാന തൊഴിലാളികളുടെ 708 കുട്ടികളും ഇതിൽ ഉൾപ്പെടും.നവജാത ശിശുക്കൾ ഉൾപ്പെടെ അഞ്ചു വയസിനു താഴെയുള്ള എല്ലാ കുട്ടികൾക്കും ഒരു ഡോസ് പോളിയോ തുള്ളി മരുന്നാണ് (രണ്ടു തുള്ളികൾ) നൽകുക. ജില്ലയിൽ 1344 സ്ഥാപനതല ബൂത്തുകളും 37 ട്രാൻസിറ്റ് ബൂത്തുകളും 46 മൊബൈൽ ബൂത്തുകളും സജ്ജീകരിക്കും. രാവിലെ എട്ടുമുതൽ വൈകിട്ട് അഞ്ചുവരെയാണ് മരുന്ന് വിതരണം. സർക്കാർ-സ്വകാര്യ ആശുപത്രികൾ, ആരോഗ്യ കേന്ദ്രങ്ങൾ, അങ്കണവാടികൾ, തിരഞ്ഞെടുത്ത സ്‌കൂളുകൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ, ബോട്ട് ജെട്ടികൾ, എന്നിവടങ്ങളിലാണ് പ്രത്യേക ബൂത്തുകൾ പ്രവർത്തിക്കുക.