ആലപ്പുഴ: സാക്ഷരതാ മിഷന്റെ നേതൃത്വത്തിൽ ഡിജിറ്റൽ സാക്ഷരതാ പരിപാടി നടപ്പാക്കുമെന്ന് ജില്ലാ സാക്ഷരതാ സമിതി ചെയർപേഴ്‌സണായ ജില്ലാ പഞ്ചായത്ത് പ്രസിഡന്റ് കെ.ജി. രാജേശ്വരി അറിയിച്ചു. സർക്കാർ സേവനങ്ങൾ ഓൺലൈനിൽ ലഭ്യമാകുന്ന സാഹചര്യത്തിൽ ഡിജിറ്റൽ സാക്ഷരത നേടുന്നത് സാധാരണക്കാർക്ക് ഗുണകരമാകും. ആദ്യഘട്ടത്തിൽ തുല്യതാ പഠിതാക്കളെയാണ് ഉൾപ്പെടുത്തുക. തുല്യതാ പഠിതാക്കൾക്ക് സ്വയംതൊഴിൽ ചെയ്യുന്നതിന് പ്രത്യേക പരിശീലന പരിപാടിയും ആവിഷ്‌കരിച്ചിട്ടുണ്ട്. ജോബ് സ്‌കിൽ അക്വിസിഷൻ പ്രോഗ്രാം ജില്ലയിൽ ഒരു പഞ്ചായത്തിലാകും ആദ്യ ഘട്ടത്തിൽ നടപ്പാക്കുക. ഭരണഘടനാ സാക്ഷരതാ പരിപാടി തുടരാനും വികസനവും പരിസ്ഥിതിയും എന്ന വിഷയത്തിൽ ബോധവത്കരണ പരിപാടികൾ നടത്താനും സാക്ഷരതാ മിഷൻ തീരുമാനിച്ചു. പത്താംതരം, ഹയർ സെക്കൻഡറി തുല്യതാ കോഴ്‌സുകളുടെ സമ്പർക്ക പഠന ക്ലാസുകൾ ഓഫ് ലൈനായി നടത്തുന്നതിന് സർക്കാർ അനുമതി ലഭിച്ചതായും പ്രസിഡന്റ് പറഞ്ഞു.