തുറവൂർ: കെ.എസ്.ആർ.ടി.സി ബസ് സർവീസ് നിറുത്തിയതോടെ തുറവൂർ ഗ്രാമപഞ്ചായത്തിലെ ഉൾപ്രദേശങ്ങളായ പുത്തൻകാവ്, മനക്കോടം എന്നിവിടങ്ങളിൽ യാത്രാക്ലേശം രൂക്ഷം. ചേർത്തല ഡിപ്പോയിൽ നിന്ന് തുറവൂർ, പുത്തൻകാവ്, മനക്കോടം വഴി ആലപ്പുഴ, മേനക, തോപ്പുംപടി എന്നിവിടങ്ങളിലേക്ക് നേരത്തെ മൂന്ന് ബസുകൾ സർവീസ് നടത്തിയിരുന്നു. എന്നാൽ കൊവിഡും റോഡിന്റെ ശോച്യാവസ്ഥയും കാരണം സർവീസുകൾ നിറുത്തുകയായിരുന്നു.

റോഡ് ടാർ ചെയ്തിട്ടും ബസ് സർവീസ് പുനരാരംഭിക്കാൻ അധികൃതർ തയ്യാറാകുന്നില്ലെന്നാണ് നാട്ടുകാരുടെ പരാതി. സ്കൂൾ കുട്ടികളടക്കം കിലോമീറ്ററുകൾ കാൽനടയായി സഞ്ചരിക്കേണ്ട അവസ്ഥയുള്ളത്. ബസ് സർവീസുകൾ അടിയന്തരമായി പുനഃസ്ഥാപിക്കണമെന്ന് മനക്കോടം പാരിഷ് ഹാളിൽ ചേർന്ന കെ.എൽ.സി.എ വാർഷിക ജനറൽ ബോഡി യോഗം ആവശ്യപ്പെട്ടു. യൂണിറ്റ് ഡയറക്ടർ ഫാ. ഫ്രാൻസിസ് കൈതവളപ്പിൽ ഉദ്ഘാടനം ചെയ്തു. കെ.ജെ. ടൈറ്റസ് അദ്ധ്യക്ഷനായി. ഭാരവാഹികളായി സി.ഡബ്ലിയു. കുഞ്ഞുമോൻ (പ്രസിഡന്റ്‌), കെ.ജെ. ടൈറ്റസ് (സെക്രട്ടറി), യുബി (ട്രഷറർ) എന്നിവരെ തിരഞ്ഞെടുത്തു.