ഹരിപ്പാട്: പക്ഷിപ്പനി സ്ഥിരീകരിച്ച 6920 താറാവുകളെ വീയപുരം വെള്ളംകുളങ്ങരയിലെ കരീപാടത്തിന് സമീപം ഇന്നലെ കൊന്നൊടുക്കി​. താമരക്കുളം കണ്ണനാംകുഴി ഷെഫീക്കിന്റെ ഉടമസ്ഥതയിലുള്ള താറാവുകളെ ആണ് കൊന്നത്. മൃഗസംരക്ഷണ വകുപ്പിന്റെ റാപ്പിഡ് റസ്പോൺസ് ടീമിന്റെ നേതൃത്വത്തിൽ വീയപുരം പഞ്ചായത്തിന്റെ സഹകരണത്തോടെയായിരുന്നു നടപടി. ഡോ.സുൾഫിക്കർ, ഡോ.പ്രിയശിവറാം, ഡോ.ബിന്ദുകുമാരി, ഡോ.വിപിൻ ചന്ദ്രൻ എന്നിവരുടെ നേതൃത്വത്തി​ലുള്ള 20 അംഗങ്ങൾ ഉൾക്കൊള്ളുന്ന സംഘമാണ് പരി​ശോധന നടത്തി​യത്. 5 താറാവിനെ തിരുവല്ലയിലെ മഞ്ഞാടിയിലും 10താറാവിനെ ഭോപ്പാലിലും ,6താറാവിനെ ആലപ്പുഴയിലുമാണ് പരിശോധനക്ക് വിധേയമാക്കിയത്. എല്ലാപരിശോധനയിലും പക്ഷിപ്പനിസ്ഥിരീകരിച്ചിരുന്നു.പരിശോധനഫലം ലഭിക്കാൻ 15ദിവസത്തോളം കാത്തിരിക്കേണ്ടിവന്നുവെന്നും ഷെഫീക് പറഞ്ഞു. 16ലക്ഷം രൂപയോളം ഈ ഇനത്തിൽ നഷ്ടമുണ്ടെന്നും നഷ്ടപരിഹാരം ലഭിക്കില്ലെന്ന കളക്ടറുടെ അറിയിപ്പ് തന്നെ കടക്കെണിയിലാക്കിയെന്നും ഷെഫീക്ക് പറഞ്ഞു. ഗ്രാമപഞ്ചായത്ത് പ്രസിഡന്റ് ഷീജസുരേന്ദ്രൻ ,വൈസ് പ്രസിഡന്റ് പി.എ.ഷാനവാസ്, വികസന സ്റ്റാൻഡിംഗ് കമ്മിറ്റി ചെയർപേഴ്സൺ പി.ഡി.ശ്യാമള,വാർഡ്മെമ്പർ ജയൻ എന്നിവരും പങ്കെടുത്തു.