ചേർത്തല: സഹോദരീ ഭർത്താവിനെ കൊലപ്പെടുത്താൻ ശ്രമിച്ച കേസിലെ പ്രതി പിടിയിലായി. നിരവധി കേസുകളിലെ പ്രതിയായ ചേർത്തല തെക്ക് പഞ്ചായത്ത് ചിറയിൽ സുധീഷി (വെരുക് സുധീഷ് -34)നെയാണ് ചേർത്തല തെക്ക് പഞ്ചായത്ത് 15ാം വാർഡിൽ പടിഞ്ഞാറെ ആഞ്ഞിലിക്കാട്ട് വീട്ടിൽ അനീഷിനെ (37) കൊലപ്പെടുത്താൻ ശമിച്ച കേസിൽ അർത്തുങ്കൽ പൊലീസ് അറസ്​റ്റ് ചെയ്തത്. അറസ്​റ്റ് ചെയ്തത്. 2021 ഡിസംബർ 8ന് രാത്രി ചക്കനാട്ട് ക്ഷേത്രത്തിന് സമീപമായിരുന്നു സംഭവം. കൈക്കോടാലി കൊണ്ട് അനീഷിനെ തലയ്ക്ക് വെട്ടുകയായിരുന്നുവെന്ന് പൊലീസ് പറഞ്ഞു.സുധീഷിന്റെ സഹോദരിയുടെ ഭർത്താവാണ് അനീഷ്. അർത്തുങ്കൽ,മാരാരിക്കുളം പൊലീസ് സ്‌​റ്റേഷനുകളിലായി കൊലപാതകം അടക്കം 19 കേസുകളിൽ സുധീഷ് പ്രതിയാണെന്ന് പൊലീസ് പറഞ്ഞു. രണ്ട് തവണ സുധീഷിനെ കാപ്പ നിയമപ്രകാരം അറസ്​റ്റ് ചെയ്ത് കരുതൽ തടങ്കലിൽ പാർപ്പിച്ചിരുന്നു. അർത്തുങ്കൽ പൊലീസ് സ്റ്റേഷൻ ഹൗസ് ഓഫീസർ പി.ജി. മധു,എസ്.ഐ.അനിൽകുമാർ,എസ്.സി.പി.ഒ. ശ്യാം,സി.പി.ഒ.സുധീഷ് എന്നിവർ ചേർന്നാണ് സുധീഷിനെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡു ചെയ്തു.