 സ്മാർട്ട് കോർട്ടിന്റെ ആദ്യഘട്ടം ഉദ്ഘാടനം ചെയ്തു

കൊച്ചി: ഹൈക്കോടതിയിൽ ചീഫ് ജസ്റ്റിസിന്റേതടക്കം ആറ് കോടതികളും കോലഞ്ചേരി ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയും തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്‌ട്രേട്ട് കോടതിയും കടലാസ് രഹിത സ്മാർട്ട് ഡിജിറ്റൽ കോർട്ട് റൂമുകളായി. രാജ്യത്തെതന്നെ ആദ്യത്തെ ഇ ഫയലിംഗ് മജിസ്‌ട്രേട്ട് കോടതികളാണ് കോലഞ്ചേരിയി​ലും തി​രുവനന്തപുരത്തും പ്രവർത്തി​ക്കുക.

ഹൈക്കോടതി ഓഡിറ്റോറിയത്തിൽ നടന്ന ചടങ്ങിൽ ഇ ഫയലിംഗ് സംവിധാനത്തിന്റെ ഉദ്ഘാടനം സുപ്രീംകോടതിയിലെ ഇ കമ്മിറ്റി അദ്ധ്യക്ഷൻകൂടിയായ ജസ്റ്റിസ് ഡി.വൈ. ചന്ദ്രചൂഢും കടലാസ് രഹിത കോടതികളുടെ ഉദ്ഘാടനം മുഖ്യമന്ത്രി പിണറായി വിജയനും ഓൺ​ലൈനായി​ നി​ർവഹി​ച്ചു. ഇ ഓഫീസ് കേരള ഹൈക്കോടതി ചീഫ് ജസ്റ്റിസ് എസ്. മണികുമാർ ഉദ്ഘാടനം ചെയ്തു.

ഇ സർവീസിലൂടെ കോടതി വ്യവഹാരങ്ങൾ എളുപ്പമാക്കുന്നതിനും വേഗത്തിൽ നിയമനടപടികൾ പൂർത്തീകരിക്കാനും സാധിക്കുമെന്ന് ജസ്റ്റിസ് ഡി.വൈ. ചന്ദ്രചൂഢ് പറഞ്ഞു. വിദ്യാഭ്യാസത്തിലും സാക്ഷരതയിലും മുന്നിട്ടുനിൽക്കുന്ന കേരളത്തിൽ എല്ലാവരിലേക്കും പദ്ധതിയുടെ ഗുണഫലം വേഗത്തിൽ എത്തിക്കാൻ കഴിയുമെന്നും അദ്ദേഹം പറഞ്ഞു.

സർക്കാർ സംവി​ധാനങ്ങൾ ഓൺ​ലൈനാകുന്നതി​ലും കേരളം മാതൃകയായെന്ന് മുഖ്യമന്ത്രി​ പി​ണറായി​ വി​ജയൻ പറഞ്ഞു. ജനങ്ങളിലേക്ക് എളുപ്പത്തിൽ നീതി എത്തിക്കുകയാണ് ലക്ഷ്യം. കൂടുതൽ കോടതികൾ കടലാസ് രഹിതമാക്കുന്നതിനുള്ള നടപടികൾ പുരോഗമിക്കുകയാണെന്നും അദ്ദേഹം പറഞ്ഞു.

മന്ത്രി പി. രാജീവ്, അഡ്വക്കേറ്റ് ജനറൽ കെ. ഗോപാലകൃഷ്ണക്കുറുപ്പ് , കേരള ബാർ കൗൺസിൽ ചെയർമാൻ ജോസഫ് ജോൺ, കേരള ഹൈക്കോർട്ട് അഡ്വക്കേറ്റ്സ് അസോസിയേഷൻ നിയുക്ത പ്രസിഡന്റ് രാജേഷ് വിജയൻ എന്നിവർ പ്രസംഗിച്ചു. ഹൈക്കോടതി ജഡ്ജിമാരടക്കമുള്ളവർ ചടങ്ങിൽ പങ്കെടുത്തു.