കോലഞ്ചേരി: നാശത്തിന്റെ വക്കിലായ ചേലക്കുളത്തെ ഖാദി യൂണി​റ്റിന് പുനർജന്മം. പൂർണ്ണതോതിൽ പ്രവർത്തന സജ്ജമായ ഖാദി ബ്രൈറ്റ് ഡിറ്റർജന്റ് യൂണിറ്റ് മന്ത്രി പി.രാജീവ് ഇന്ന് രാവിലെ 9 ന് നാടിന് സമർപ്പിക്കും. അഡ്വ.പി.വി. ശ്രീനിജിൻ എം.എൽ.എ അദ്ധ്യക്ഷനാകും. ഖാദി വ്യവസായ ബോർഡ് വൈസ് ചെയർമാൻ പി.ജയരാജൻ മുഖ്യപ്രഭാഷണം നടത്തും. ഖാദി ഉത്പന്നങ്ങൾക്ക് ജനങ്ങൾ നല്കിയ സ്വീകാര്യതയെ തുടർന്നാണ് ഡിറ്റർജന്റ് പൗഡർ യൂണിറ്റ് എന്ന ആശയത്തിന് തുടക്കമിട്ടത്. ഖാദി ബ്രൈറ്റ് പൗഡർ എന്ന പേരിലാകും വിപണിയിലെത്തുന്നത്. പുതിയ സംരംഭം കിഴക്കമ്പലം ചേലക്കുളത്ത് വർഷങ്ങളായി നാശോന്മുഖമായി കിടന്ന യൂണിറ്റിന് പുനർജന്മമേകുമെന്ന് എം.എൽ.എ പറഞ്ഞു.

നിലവിൽ 19 ജീവനക്കാരുമായി സർക്കാർ വകുപ്പുകൾക്ക് വേണ്ട ഫയൽ ബോർഡ് നിർമ്മാണ യൂണി​റ്റ് മാത്രമാണ് ഇവിടെ പ്രവർത്തിച്ചിരുന്നത്. സർക്കാർ വകുപ്പുകളിൽ ഇ ഫയലിംഗ് സംവിധാനങ്ങൾ വന്നതോടെ ഫയലുകൾക്ക് ഓർഡർ കുറഞ്ഞു. ഇതോടെ നിലവിലുള്ള ജീവനക്കാർക്ക് പണിയില്ലാത്ത അവസ്ഥയിലെത്തിയിരുന്നു. 30 വർഷം മുമ്പാണ് ഖാദി ബോർഡിന്റെ യൂണി​റ്റ് ചേലക്കുളത്ത് തുടങ്ങിയത്. സ്വന്തമായി വാങ്ങിയ ഒന്നേകാൽ ഏക്കർ സ്ഥലത്ത് ബഹുനില മന്ദിരങ്ങളടക്കം നിർമ്മാണം പൂർത്തിയായതാണ്. നേരത്തെ സിവിൽ സപ്ലൈസിനായി റോയൽ ഇന്ത്യ ബാർ സോപ്പും ഇവിടെ നിർമ്മിച്ചിരുന്നു. ഒട്ടേറെ തൊഴിൽ സാദ്ധ്യതകളുള്ള യൂണി​റ്റിൽ 120 തൊഴിലാളികളാണ് പണിയെടുത്തിരുന്നത്. ഖാദിയൂണി​റ്റിന്റെ ശോച്യാവസ്ഥ പരിഹരിക്കണമെന്നാവശ്യപെട്ട് മാറി മാറി വരുന്ന സർക്കാരുകൾക്ക് നിവേദനം നൽകിയെങ്കിലും യാതൊരു പരിഹാരവുമുണ്ടായിരുന്നില്ല. അതിനിടെയാണ് എം.എൽ.എയുടെ അടിയന്തര ഇടപെടലുണ്ടായത്. ഏക്കർ കണക്കിന് ഭൂമിയും കെട്ടിടങ്ങളും കോടികൾ വിലമതിക്കുന്ന യന്ത്ര സാമഗ്രികളും യഥാസമയം അ​റ്റകു​റ്റപണികൾ നടത്താതെയും പ്രവർത്തിക്കാതെയും തുരുമ്പെടുത്ത അവസ്ഥയിലായിരുന്നു. പല യന്ത്രങ്ങളും പ്രവർത്തനം നിലച്ചു. ഇത്തരം പ്രശ്‌നങ്ങളെല്ലാം പരിഹരിച്ച് അടിയന്തരമായി യൂണി​റ്റ് പ്രവർത്തന സജ്ജമാക്കുകയായിരുന്നു. നിലച്ചു പോയ ബുക്ക് നിർമ്മാണ യൂണി​റ്റ് പുനരുജ്ജീവിപ്പിക്കാനും പദ്ധതിയുണ്ടെന്ന് എം.എൽ.എ അറിയിച്ചു. പേപ്പർ കാരീബാഗ് നിർമ്മാണ യൂണി​റ്റിനുള്ള മുഴുവൻ യന്ത്ര സാമഗ്രികളും ഇവിടെയുണ്ട്. വൈകാതെ യൂണിറ്റ് പൂർണ്ണതോതിൽ പ്രവർത്തന സജ്ജമാക്കുന്നതിനുള്ള നടപടികളുണ്ടാകും.