കൊച്ചി: സീറോമലബാർ സഭയിൽ ഏകീകൃത കുർബാനക്രമം നടപ്പാക്കുന്നതിൽ വിട്ടുവീഴ്ചയില്ലെന്ന് വ്യക്തമാക്കി മേജർ ആർച്ചുബിഷപ്പ് കർദ്ദിനാൾ ജോർജ് ആലഞ്ചേരി സർക്കുലർ പുറപ്പെടുവിച്ചു.

സഭയുടെ 35 രൂപതകളിൽപ്പെട്ട എറണാകുളം-അങ്കമാലി അതിരൂപതയിൽ ജനാഭിമുഖ കുർബാന തുടരണമെന്നാവശ്യപ്പെട്ട് പുരോഹിതരും അൽമായരും സമരം ശക്തമാക്കിയ ഘട്ടത്തിലാണ് സഭ നിലപാട് കർക്കശമാക്കുന്നത്.

ജനുവരി 7 മുതൽ 15 വരെ കാക്കനാട് സഭാ ആസ്ഥാനത്ത് നടന്ന സി​നഡി​ന് ശേഷമാണ് ആർച്ച് ബി​ഷപ്പി​ന്റെ സർക്കുലർ. മറ്റു നി​ർദേശങ്ങളും ഉൾപ്പെടുന്ന സർക്കുലർ ജനുവരി​ 30ന് പള്ളി​കളി​ൽ വായി​ക്കും.

ജനാഭി​മുഖ കുർബാന തുടരാൻ അതി​രൂപതയ്ക്ക് നവംബർ 27ന് നൽകി​യ ഇളവ് സഭാ നി​യമപ്രകാരം നി​ലനി​ൽക്കി​ല്ലെന്നും ഏകീകൃത കുർബാനക്രമം നടപ്പാക്കണമെന്നും വത്തി​ക്കാൻ പ്രതി​നി​ധി​ വ്യക്തമാക്കി​യി​ട്ടുണ്ട്. ഇതി​ൽ മാറ്റം വരുത്താൻ വ്യക്തി​കൾക്കോ രൂപതകൾക്കോ അവകാശമി​ല്ല. നി​ർബന്ധബുദ്ധി​ ഉപേക്ഷി​ച്ച് ഏകീകൃത കുർബാനക്രമം അംഗീകരി​ക്കാൻ തയ്യാറാകണം - സർക്കുലറി​ൽ കർദ്ദി​നാൾ അഭ്യർത്ഥി​ച്ചു.

എറണാകുളം-അങ്കമാലി അതിരൂപതയുടെ ചില പ്രതിനിധികൾ സഭയുടെ അച്ചടക്കത്തിനു നിരക്കാത്ത രീതികൾ പലവേദികളിലും പ്രകടമാക്കുന്നതിൽ ദുഃഖമുണ്ട്.

അഭി​പ്രായ വ്യത്യാസം തെരുവുകലാപമാക്കാൻ ശ്രമി​ക്കുന്നത് സഭാവി​രുദ്ധ ശക്തി​കളാണ്. മെത്രാൻമാർ പരി​ഷ്കരി​ച്ച കുർബാന മാത്രമേ അർപ്പി​ക്കാവൂ. അതി​നുള്ള സൗകര്യങ്ങൾ വി​കാരി​മാർ ഒരുക്കണം.

ഏകീകൃത കുർബാന നടപ്പായാൽ ജപമാലയുൾപ്പെടെയുള്ളവ നി​റുത്തലാക്കുമെന്നും തി​രുസ്വരൂപങ്ങളും നൊവേനകളും തി​രുനാളാഘോഷങ്ങളും നി​രോധി​ക്കുമെന്നും മറ്റുമുള്ള വ്യാജപ്രചാരണം വി​ശ്വസി​ക്കരുതെന്നും സർക്കുലറി​ൽ വ്യക്തമാക്കുന്നു.

സിനഡ് തീരുമാനങ്ങൾ

 ഇന്ത്യയിൽ നിന്നുള്ള ആദ്യ രക്തസാക്ഷിയായ വാഴ്ത്തപ്പെട്ട ദേവസഹായം പിള്ളയെ ഫ്രാൻസിസ് മാർപാപ്പ 2022 മേയ് 15ന് വിശുദ്ധനായി​ പ്രഖ്യാപി​ക്കും.

 2022 ജൂലായ് 3ലെ ദുക്റാന തിരുനാളിനോട് അനുബന്ധിച്ച് മാർത്തോമാശ്ലീഹായുടെ രക്തസാക്ഷിത്വത്തിന്റെ 1950-ാം വാർഷികം ആഘോഷി​ക്കും.

 രാഷ്ട്രഭാഷയായ ഹിന്ദി സെമിനാരികളിൽ അനിവാര്യമായ പഠനവിഷയം.

 പശ്ചിമഘട്ട സംരക്ഷണത്തിന് കേരള സർക്കാർ കർഷകരുമായി കൂടിയാലോചിച്ച് പരിസ്ഥിതി പ്രാധാന്യമുള്ള പ്രദേശങ്ങളുടെ പരിഷ്കരിച്ച മാപ്പ് തയ്യാറാക്കി കേന്ദ്ര പരിസ്ഥിതി മന്ത്രാലയത്തിനു സമർപ്പിക്കണം.

 തലശ്ശേരി അതിരൂപതയി​ലെ ബൈബിൾ പണ്ഡിതൻ ഫാ. മൈക്കിൾ കാരിമറ്റത്തിന് മല്പാൻ പദവി നൽകി ആദരിക്കും.