 ചൂട് 32 ഡിഗ്രി സെൽഷ്യസ് കടന്നു.

കോലഞ്ചേരി: നാടും നഗരവും ചൂടിൽ പൊള്ളി കരിയുന്നു. പുറത്തിറങ്ങാൻ വയ്യാത്ത സ്ഥിതിയായി. വേനൽക്കാലമാരംഭിക്കും മുന്നേയുള്ള കാലാവസ്ഥാമാ​റ്റം ഏറെ ഭീതിയോടെയാണ് ജനങ്ങൾ വീക്ഷിക്കുന്നത്. ശരാശരിയിൽ നിന്ന് താപനില ഉയരുന്നതായാണ് കാലാവസ്ഥാകേന്ദ്രവും റിപ്പോർട്ട് ചെയ്യുന്നത്. മഴ മാറിനിൽക്കുതാണ് ചൂടുകൂടാൻ കാരണമായി പറയുന്നത്. പതിവിലും വിപരീതമായി ഈ വർഷം മഴ കൂടുതലായി ലഭിച്ചിരുന്നു, എന്നാൽ അതിനെ വെല്ലുന്ന ചൂടാണിപ്പോൾ. പുലർച്ചെയുള്ള തണുപ്പും പീന്നീടുവരുന്ന ചൂടും പകർച്ചവ്യാധികൾക്കും ഇടയാക്കും. കഠിനമായ ചൂടിൽ കുഴഞ്ഞുവീണുള്ള അത്യാഹിതങ്ങളും കൂടുന്നു.

 വൈദ്യുതിമുടക്കവും പാരയാകുന്നു

ചൂടിനൊപ്പം വൈദ്യുതി മുടക്കവും കൂടിയാകുമ്പോൾ ദുരിതം ഇരട്ടിക്കുകയാണ്. സബ് സ്​റ്റേഷൻ പരിധിയിൽ വരുന്ന സ്ഥലങ്ങളിൽ മിക്കവാറും ദിവസങ്ങളിൽ ഉണ്ടാകുന്ന വൈദ്യുതി മുടക്കവും ജനങ്ങളെ വലയ്ക്കുന്നു. മിക്കവാറും ദിവസങ്ങളിൽ അ​റ്റകു​റ്റപ്പണികളുടെ പേരിൽ രാവിലെ മുതൽ വൈകിട്ട് വരെ അപ്രഖ്യാപിത വൈദ്യുതി മുടക്കവുമുണ്ട്.

 ജാഗ്രത പാലിക്കണം

വേനൽകാഠിന്യം വർദ്ധിച്ചതിനാൽ ജാഗ്രത പാലിക്കണമെന്ന് ആരോഗ്യവകുപ്പ് നിർദേശിച്ചു. സൂര്യാഘാത സാദ്ധ്യത മുന്നിൽക്കണ്ട് 12 മുതൽ വൈകിട്ട് 3വരെ വിശ്രമസമയമാക്കി തൊഴിൽ സമയം ക്രമീകരിക്കണം. വഴിയരികിൽ ആരെങ്കിലും വീണുകിടക്കുന്നതു കണ്ടാൽ അവഗണിക്കാതെ സഹായം ലഭ്യമാക്കണം.

 ശ്രദ്ധിക്കാം ഇക്കാര്യങ്ങൾ

ധാരാളം ശുദ്ധജലം കുടിക്കണം

തൊഴിലിടങ്ങളിൽ ശുദ്ധജലം ഉറപ്പാക്കണം

പകൽ യാത്രചെയ്യുമ്പോൾ ശുദ്ധജലവും കുടയും കരുതണം

രോഗികളും മുതിർന്നവരും കുട്ടികളും പ്രത്യേകം ശ്രദ്ധിക്കണം

ക്ഷീണം അനുഭവപ്പെട്ടാൽ വേണ്ടത്ര വിശ്രമം അനുവദിക്കണം

ദീർഘനേരം വെയിലേ​റ്റുള്ള നടത്തവും ജോലിയും ഒഴിവാക്കുന്നതാണ് ഉത്തമം

കൃത്രിമ ശീതളപാനീയങ്ങൾ, മദ്യം, പുകവലി പാടേ ഉപേക്ഷിക്കണം.