വൈപ്പിൻ: നായരമ്പലം നെടുങ്ങാട് കളവമ്പാറ ഗംഗാധരൻ റോഡ് യാഥാർത്ഥ്യത്തിലേക്ക്. നാട്ടുകാരുടെ ദീർഘകാലത്തെ ആവശ്യമാണ് സാക്ഷാത്കൃതമാകുന്നത്. ആധുനിക മാനദണ്ഡങ്ങൾക്കനുസരിച്ചുള്ള റോഡിന്റെ നിർമ്മാണോദ്ഘാടനം കെ. എൻ. ഉണ്ണികൃഷ്ണൻ എം.എൽ.എ നിർവ്വഹിച്ചു. ചടങ്ങിൽ ഗ്രാമപഞ്ചായത്ത് പ്രസിഡന്റ് നീതു ബിനോദ് അദ്ധ്യക്ഷത വഹിച്ചു.

മണ്ഡലത്തിന്റെ ആസ്തി വികസനഫണ്ടിൽനിന്ന് 19.80 ലക്ഷം രൂപ ചെലവിലാണ് പുതിയ റോഡ് നിർമ്മിക്കുന്നത്. 25 മീറ്റർ നീളത്തിൽ കരിങ്കൽഭിത്തി കെട്ടി 120 മീറ്റർ ദൈർഘ്യത്തിൽ നിർമ്മിക്കുന്ന റോഡിന് മൂന്നുമീറ്റർ വീതിയുണ്ടാകും. റോഡ് ഉയർത്തി ഇന്റർലോക്കിംഗ് കട്ട വിരിക്കും. 68 മീറ്റർ നീളത്തിൽ കാനയും റോഡിനൊപ്പം നിർമ്മിക്കും. ഹാർബർ എൻജിനിയറിംഗ് വകുപ്പിനാണ് പദ്ധതിച്ചുമതല.
റോഡിന് സ്ഥലം വിട്ടുനൽകിയ കളവമ്പാറ മുരളിയെ എം.എൽ.എ. ആദരിച്ചു. എൻജിനിയർ സുബിൻ ജോർജ് പദ്ധതി വിശദീകരിച്ചു. ബ്ലോക്ക് പഞ്ചായത്ത് അംഗം ഇ. പി. ഷിബു, വാർഡ് അംഗം താര കൃഷ്ണ, മുൻ വാർഡ് അംഗം പി. ആർ. ബിജു, റോഡ് വികസന സമിതി കൺവീനർ എൻ. വി. അനിൽ എന്നിവർ സംസാരിച്ചു.