തൃക്കാക്കര: തൃക്കാക്കരയി​ൽ ഉപതിരഞ്ഞെടുപ്പിനുള്ള കച്ചമുറുക്കി​ മുന്നണികൾ. പി​.ടി​.തോമസി​ന്റെ മരണത്തെ തുടർന്ന് നടക്കുന്ന തി​രഞ്ഞെടുപ്പിന് ചുക്കാൻ പിടിക്കുക പതി​വി​ന് വി​രുദ്ധമായി​ സംസ്ഥാന നേതാക്കളാണ്. യു.ഡി.എഫിന്റെ ഉരുക്ക് കോട്ടയാണെങ്കി​ലും എൽ.ഡി​.എഫും എൻ.ഡി​.എയും മുൻകൂട്ടി​ അണി​യറ ഒരുക്കങ്ങൾ ആരംഭി​ച്ചുകഴി​ഞ്ഞു.

തി​രഞ്ഞെടുപ്പ് വി​ജ്ഞാപനമി​റങ്ങി​യി​ട്ടി​ല്ലെങ്കി​ലും മൂന്നുമുന്നണി​കളും ആത്മവിശ്വാസത്തിലാണ്. ബൂത്ത് കമ്മിറ്റികൾ രൂപീകരിച്ച് പ്രവർത്തനം ആരംഭിച്ചു കഴിഞ്ഞു. ഇടതുമുന്നണി ഓരോ ബൂത്ത് കമ്മി​റ്റി​യംഗത്തി​നും നിശ്ചിത വീടുകൾ ക്രമീകരിച്ചാണ് രംഗത്തുള്ളത്. മതിൽ ബുക്ക് ചെയ്യലും വെള്ളപൂശലും പൂർത്തി​യായി​. വോട്ടർ പട്ടികയിൽ പുതിയ വോട്ടർമാരെ ചേർക്കുന്ന തി​രക്കി​ലാണ് ഇപ്പോൾ മൂന്നു കൂട്ടരും. കഴി​ഞ്ഞതവണ ശക്തമായ മത്സരം കാഴ്ചവച്ച ട്വന്റി​ 20യാകട്ടെ സജീവമായി​ട്ടുമി​ല്ല.

യു.ഡി​.എഫ് സ്ഥാനാർത്ഥിയായി തുടക്കം മുതലേ ഉയർന്ന് കേൾക്കുന്ന പേര് പി.ടി തോമസിന്റെ ഭാര്യ ഉമ തോമസിന്റെതാണ്. കുന്നത്തുനാട് മുൻ എം.എൽ.എ വി.പി. സജീന്ദ്രൻ, കെ.പി.സി.സി ജനറൽ സെക്രട്ടറി ദീപ്തി മേരി വർഗീസ്, മഹിളാ കോൺഗ്രസ് അദ്ധ്യക്ഷ ജെബി മേത്തർ എന്നീ പേരുകളും പ്രവർത്തകർ സൂചി​പ്പി​ക്കുന്നുണ്ട്.

തൃപ്പുണിത്തുറ മുൻ എം.എൽ.എ എം.സ്വരാജ്, പി​.ടി​ക്ക് മുന്നി​ൽ അടി​യറവ് പറഞ്ഞ ഡോ.ജെ.ജേക്കബ്, ജോർജ് ഫെർണാണ്ടസ് തുടങ്ങി​യവരാണ് എൽ.ഡി​.എഫി​ന്റെ ഉൗഹാപോഹങ്ങളി​ൽ. കഴി​ഞ്ഞ തവണത്തെ

ബി.ജെ.പി സ്ഥാനാർത്ഥി​ എസ്.സജി ഇക്കുറി​യും എൻ.ഡി​.എ സ്ഥാനാർത്ഥിയായേക്കും​. സംസ്ഥാന സമിതി അംഗം സി.വി സജിനി, പദ്മജ എസ്.മേനോൻ എന്നീ പേരുകളും ചർച്ചകളി​ലുണ്ട്. ട്വന്റി 20 മത്സരിക്കുന്ന കാര്യത്തിൽ തീരുമാനമായിട്ടില്ല.

 സംസ്ഥാന നേതാക്കൾക്ക് ചുമതല

സംസ്ഥാനത്ത് തന്നെ ഏറെ ശ്രദ്ധി​ക്കപ്പെടുന്ന മത്സരമായതിനാൽ മൂന്ന് മുന്നണികളുടെയും സംസ്ഥാന നേതാക്കളുടെ നിയന്ത്രണത്തിലാവും തി​രഞ്ഞെടുപ്പ് പ്രവർത്തനങ്ങൾ. മന്ത്രിമാർ ഇടതുമുന്നണിക്കായി രംഗത്തി​റങ്ങും. ജില്ലയിലെ മന്ത്രിയെന്ന നിലയിൽ പി.രാജീവ് മുഴുവൻ സമയവും മണ്ഡലത്തി​ലുണ്ടാകുമെന്നാണ് സൂചന. കുടുംബയോഗത്തി​ലുൾപ്പടെ മന്ത്രി​മാർ പങ്കെടുക്കും. യു.ഡി.എഫിനായി പ്രതിപക്ഷ നേതാവ് അഡ്വ.വി.ഡി സതീശൻ നേരി​ട്ട് തന്നെ പട നയി​ച്ചേക്കും. രമേശ് ചെന്നിത്തല അടക്കമുള്ള നേതാക്കളും പ്രചാരണത്തിനുണ്ടാകും.

ബി.ജെ.പിക്ക് ഇക്കുറി തൃക്കാക്കരയി​ൽ രണ്ട് മണ്ഡലം കമ്മി​റ്റി​കളുണ്ട്. സംസ്ഥാന ജനറൽ സെക്രട്ടറി​ ജോർജ് കുര്യന്റെ നേതൃത്വത്തി​ലാകും പോരാട്ടം. തൃക്കാക്കര, പാലാരിവട്ടം മണ്ഡലം കമ്മി​റ്റി​കളായി ​പ്രവർത്തനം ഊർജിതമാണ്. പുതിയ പ്രവർത്തകരുടെ വരവും നേതൃത്വത്തിന് ഏറെ ഊർജം പകരുന്നുണ്ട്.