ഇടുക്കി: പ്രത്യേക സംക്ഷിപ്ത വോട്ടർപട്ടിക പുതുക്കൽ- 2022ന്റെ ഭാഗമായി അന്തിമ വോട്ടർ പട്ടിക പ്രസിദ്ധീകരിച്ചു. വോട്ടർ പട്ടികയുടെ കോപ്പികൾ എല്ലാ താലൂക്ക് ഇലക്ഷൻ വിഭാഗങ്ങളിലും വില്ലേജ്, പഞ്ചായത്ത് ഓഫീസുകളിലും ഇലക്ഷൻ കമ്മിഷന്റെ ഔദ്യോഗിക വെബ്‌സൈറ്റിലും ലഭ്യമാണ്. 2021 നവംബർ 8 ൽ പ്രസിദ്ധീകരിച്ചിട്ടുളള കരട് വോട്ടർ പട്ടിക സംബന്ധിച്ച് പൊതുജനങ്ങളിൽ നിന്ന് ലഭിച്ച അക്ഷേപങ്ങളും മറ്റ് അപാകതകളും പരിഹരിച്ചതിന് ശേഷമാണ് അന്തിമ വോട്ടർ പട്ടിക പ്രസിദ്ധീകരിച്ചത്. പ്രസിദ്ധീകരിക്കപ്പെട്ട വോട്ടർ പട്ടികയുടെ പകർപ്പുകൾ അംഗീകൃത രാഷ്ട്രീയപാർട്ടികൾക്കും ജില്ലയിലെ ബൂത്ത് ലെവൽ ഓഫീസർമാർക്കും നിയമാനുസൃതം കൈമാറാൻ എല്ലാ ഇലക്ടറൽ രജിസ്‌ട്രേഷൻ ഓഫീസർ & തഹസിൽദാർമാർക്കും നിർദ്ദേശം നൽകിയതായി ജില്ലാ ഇലക്ഷൻ ഓഫീസർ കൂടിയായ കളക്ടർ ഷീബ ജോർജ്ജ് അറിയിച്ചു.

ക്വിസ്- പോസ്റ്റർ ഡിസൈൻ മത്സരം

ഇടുക്കി: സമ്മതിദായകർക്കുള്ള ദേശീയ ദിനമായ 25ന് ഇലക്ഷൻ വിഭാഗത്തിന്റെ നേതൃത്വത്തിൽ ജില്ലയിലെ കോളേജുകളിലും സ്‌കൂളുകളിലും ക്വിസ്, പോസ്റ്റർ ഡിസൈൻ, ഷോർട്ട് ഫിലിം മത്സരങ്ങൾ സംഘടിപ്പിക്കും. കോളേജ് വിദ്യാർത്ഥികൾക്കിടയിൽ ക്വിസ്സ് മത്സരവും ഷോർട്ട് ഫിലിം മത്സരവും സംഘടിപ്പിക്കും. 8 മുതൽ 12 വരെ ക്ലാസ്സുകളിലുള്ള വിദ്യാർത്ഥികൾക്കായി പോസ്റ്റർ ഡിസൈൻ (വാട്ടർ കളർ പെയിന്റിംഗ്) മത്സരവും നടത്തും.

അപേക്ഷ തീയതി നീട്ടി

ഇടുക്കി: അക്ഷയ ഊർജ്ജ രംഗത്ത് മികച്ച പ്രവർത്തനങ്ങൾ നടത്തിയിട്ടുള്ളവർക്ക് കേരള സർക്കാർ നൽകുന്ന അവാർഡുകൾക്ക് അപേക്ഷ നൽകുന്നതിനുള്ള തീയതി 21 വരെ നീട്ടി. പൊതു സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, തദ്ദേശ സ്വയംഭരണ സ്ഥാപനങ്ങൾ, സർക്കാർ ഇതര സംഘടനകൾ, ഗവേഷണ സ്ഥാപനങ്ങൾ, യുവ സംരംഭകർ, വാണിജ്യ സംരംഭകർ, ചെറുകിട വ്യവസായ സ്ഥാപനങ്ങൾ തുടങ്ങി വിവിധ മേഖലകളിലുള്ളവർക്കാണ് സംസ്ഥാന സർക്കാർ അനെർട്ട് മുഖേന അവാർഡുകൾ നൽകുന്നത്. 2019 ഏപ്രിൽ 1 മുതൽ 2021 മാർച്ച് 31 വരെയുള്ള കാലയളവിലെ പ്രവർത്തനങ്ങളാണ് അവാർഡിനായി പരിഗണിക്കുന്നത്. ഓരോ മേഖലയിലും അവാർഡിന് അർഹരാകുന്നവർക്ക് ഒരു ലക്ഷം രൂപ വീതവും, ഫലകവും, പ്രശസ്തിപത്രവും നൽകും. ഈ രംഗത്ത് സമഗ്ര സംഭാവന നൽകിയ വ്യക്തികൾ, സ്ഥാപനങ്ങൾ എന്നിവർക്ക് പ്രത്യേക അവാർഡ് നോമിനേഷൻ അടിസ്ഥാനത്തിൽ നൽകും. ദേശീയ ശാസ്ത്ര ദിനമായ ഫെബ്രുവരി 28ന് അവാർഡ് വിതരണം ചെയ്യും. അപേക്ഷ ഫോറവും,മറ്റ് മാർഗ്ഗനിർദേശങ്ങളും അനെർട്ടിന്റെ www.anert.gov.in എന്ന വെബ്‌സൈറ്റിൽ ലഭ്യമാണ്. നിശ്ചിത അപേക്ഷകൾ ചീഫ് എക്‌സിക്യൂട്ടീവ് ഓഫീസർ, അനെർട്ട്, വികാസ് ഭവൻ പി. ഒ, തിരുവനന്തപുരം 695033 എന്ന വിലാസത്തിൽ 21ന് മുമ്പായി ലഭിക്കണം. കൂടുതൽ വിവരങ്ങൾക്ക് 18004251803 എന്ന ടോൾ ഫ്രീ നമ്പറിൽ ബന്ധപ്പെടുക.