കാഞ്ഞങ്ങാട്: കൊവിഡ് വ്യാപനം കൂടുന്ന സാഹചര്യത്തിൽ നഗരസഭ പരിധിയിൽ നിയന്ത്രണമേർപ്പെടുത്താൻ കോർ കമ്മിറ്റി യോഗം തീരുമാനിച്ചു. നഗരസഭ പരിധിയിൽ നടക്കുന്ന ചടങ്ങുകൾക്കും ആഘോഷങ്ങൾക്കും നിയന്ത്രണമേർപ്പെടുത്തും. വിവാഹങ്ങൾ, മരണാനന്തര ചടങ്ങുകൾ, ഉത്സവങ്ങൾ എന്നിവക്ക് നഗരസഭയിൽ നിന്ന് മുൻകൂട്ടി അനുവാദം വാങ്ങേണ്ടതാണ്. ജാഗ്രത സമിതികളുടെ നേതൃത്വത്തിൽ മുഴുവൻ വീടുകളിലും പ്രതിരോധ ബോധവൽക്കരണ സന്ദേശമെത്തിക്കാനും പൊലീസ് പരിശോധന കർശനമാക്കാനും തീരുമാനിച്ചു.

കോർ കമ്മിറ്റി യോഗത്തിൽ ചെയർപേഴ്‌സൺ കെ.വി സുജാത അദ്ധ്യക്ഷത വഹിച്ചു. സ്ഥിരംസമിതി ചെയർപേഴ്‌സൺമാരായ സി ജാനകികുട്ടി, പി അഹമ്മദലി, കെ.വി സരസ്വതി, കെ. അനീശൻ, കെ.വി മായാകുമാരി, കൗൺസിലർമാരായ കെ.കെ ബാബു, എം ബൽരാജ്, സി.കെ അഷറഫ്, സെക്രട്ടറി റോയി മാത്യു, ഹെൽത്ത് സൂപ്പർവൈസർ അരുൾ, മുഹമ്മദ്കുട്ടി, സബ് ഇൻസ്‌പെക്ടർ ശ്രീജേഷ് എന്നിവർ പങ്കെടുത്തു.