കണ്ണൂർ: നാടാകെയുള്ള ഗതാഗതക്കുരുക്കിന് പരിഹാരം കാണുകയെന്ന ലക്ഷ്യത്തോടെയുള്ള പദ്ധതികൾക്ക് സർക്കാർ രൂപം നൽകിയതായും പ്രവൃത്തികൾ സമയബന്ധിതമായി പൂർത്തിയാക്കുമെന്നും പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് പറഞ്ഞു. കണ്ണൂരിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.
വടക്കേ മലബാറിന്റെ ഗതാഗതക്കുരുക്കിന് പരിഹാരം കാണുക പ്രധാന ലക്ഷ്യമാണെന്നും മുഹമ്മദ് റിയാസ് വ്യക്തമാക്കി. .

നഗരപാതാ വികസന പദ്ധതിയുടെ ആദ്യഘട്ടം ടെൻഡർ ചെയ്യുന്നതിനു മുന്നോടിയായുള്ള നടപടികൾ പുരോഗമിച്ചു വരികയാണ്. ഒരാഴ്ചയിക്കകം അത് പൂർത്തീകരിക്കാൻ നിർദ്ദേശിച്ചിട്ടുണ്ട്. കണ്ണൂരിൽ മൂന്ന് റോഡുകളാണ് ആദ്യഘട്ടത്തിൽ ഉൾപ്പെടുത്തിയിട്ടുള്ളത്. ഇതിന്റെ ടെൻഡർ നടപടികൾ വേഗത്തിലാക്കാൻ ജില്ലാ കളക്ടറും എം.എൽ.എയുമടക്കം പങ്കെടുത്ത യോഗത്തിൽ തീരുമാനിച്ചതായും മന്ത്രി പറഞ്ഞു
കണ്ണൂർ പട്ടണത്തിന്റെ ഗതാഗത കുരുക്കിന് പരിഹാരം കാണുക എന്നത് കണ്ണൂരിന്റെ മാത്രം ആവശ്യമല്ലെന്നും അയൽ സംസ്ഥാനങ്ങളുടെ കൂടി ആവശ്യമാണെന്നും എയർപോർട്ട് റോഡ് വീതി കൂട്ടുന്നതടക്കമുള്ള റോഡ് നവീകരണ പ്രവൃത്തികൾ ഉടൻ പൂർത്തിയാക്കുമെന്നും അദ്ദേഹം പറഞ്ഞു.