പേരാമ്പ്ര: പുതുതലമുറ ഉൾപ്പെടെ എല്ലാവരെയും നീന്തൽ പരിശീലിപ്പിക്കുക എന്ന ലക്ഷ്യത്തോടെ

വെള്ളിയൂരിൽ നീന്തൽകുളം ഒരുങ്ങുന്നു. വെള്ളിയൂർ അങ്ങാടിയിൽ നിന്ന് നൂറ് മീറ്റർ അകലെ വയലിലാണ് കുളം നിർമ്മിക്കുന്നത്. ജില്ലാ പഞ്ചായത്തിന്റെ 2020 - 21 വർഷത്തെ പദ്ധതി വിഹിതമായ 50 ലക്ഷം രൂപയും. ടി.പി രാമകൃഷ്ണൻ എം.എൽ.എയുടെ ആസ്തിവികസന ഫണ്ടിൽ നിന്ന് 50 ലക്ഷം രൂപയും ഉപയോഗിച്ച് 40 സെന്റ് സ്ഥലത്താണ് കുളവും അനുബന്ധ നിർമ്മാണവും നടത്തുക. എല്ലാ പഞ്ചായത്തുകളിലും വിദ്യാർത്ഥികൾക്ക് നീന്തൽ പരിശീലിപ്പിക്കുന്നതിന് നീന്തൽകുളം വേണമെന്നിരിക്കെ മിക്കയിടത്തും നീന്തൽകുളങ്ങളില്ല.

ഇത്തരം പ്രശ്നങ്ങൾക്ക് പരിഹാരമായാണ് നീന്തൽകുളം നിർമ്മിക്കുന്നത്.

ഒന്നാം ഘട്ട പ്രവൃത്തികൾക്ക് മൈനർ ഇറിഗേഷൻ വകുപ്പും രണ്ടാം ഘട്ടത്തിൽ

തദ്ദേശ സ്വയംഭരണ വകുപ്പ് എൻജിനീയറിംഗ് വിഭാഗവും നേതൃത്വം നൽകും.

നിർമ്മാണ ചുമതല ഊരാളുങ്കൽ ലേബർ കോൺട്രാക്ട് സൊസൈറ്റിയാണ് ഏറ്റെടുത്തത്.

നീന്തൽക്കുളത്തിന്റെ പ്രവ്യത്തി ഉദ്ഘാടനം ടി.പി രാമകൃഷ്ണൻ എം.എൽ.എ നിർവഹിച്ചു.

ജില്ലാ പഞ്ചായത്ത് പ്രസിഡന്റ് ഷീജാ ശശി അദ്ധ്യക്ഷത വഹിച്ചു. നൊച്ചാട് ഗ്രാമ പഞ്ചായത്ത് പ്രസിഡന്റ് പി.എൻ ശാരദ, ബ്ലോക്ക് പഞ്ചായത്ത് പ്രസിഡന്റ് എൻ.പി ബാബു, ഗ്രാമ പഞ്ചായത്ത് വൈസ് പ്രസിഡന്റ് പി.എം കുഞ്ഞിക്കണ്ണൻ, വാർഡ് മെമ്പർ ഷിജി കൊട്ടാരയ്ക്കൽ, എടവന സുരേന്ദ്രൻ , ആർ.പി രവീന്ദ്രൻ, വി.എം അഷറഫ്, കെ.അബ്ദുൾ ഹമീദ്, ലത്തിഫ് വെള്ളിലോട്ട് , എം.കെ ഫൈസൽ, കൊടക്കൽ ലത്തീഫ് എന്നിവർ പ്രസംഗിച്ചു.

നിർമ്മിക്കുന്നത് 40 സെന്റിൽ

നിർമ്മാണ തുക 1 കോടി