കൽപ്പറ്റ: സംസ്ഥാന സർക്കാറിന്റെ പദ്ധതിയായ കേരള നോളജ് ഇക്കണോമി മിഷൻ സംഘടിപ്പിക്കുന്ന ഓൺലൈൻ തൊഴിൽ മേള 21 മുതൽ 27 വരെ നടക്കും. കേരള നോളജ് ഇക്കണോമി മിഷൻ ഡി.ഡബ്യൂ.എം.എസ് പോർട്ടലിൽ രജിസ്റ്റർ ചെയ്ത ഉദ്യോഗാർത്ഥികൾക്ക് വെർച്വൽ തൊഴിൽ മേളയിൽ പങ്കെടുക്കാം. പതിനായിരത്തിലധികം തൊഴിലവസരങ്ങളാണ് മേളയിലൂടെ സൃഷ്ടിക്കുന്നത്. ഒരിക്കൽ രജിസ്റ്റർ ചെയ്ത തൊഴിലന്വേഷകർക്ക് അനുയോജ്യമായ തൊഴിൽ കണ്ടെത്തുന്നത് വരെ ഒന്നിലധികം അവസരങ്ങൾ നൽകും. ഇതിനായി ഉദ്യോഗാർത്ഥികൾ Knowledgemission.kerala. gov.in എന്ന വൈബ്‌സൈറ്റിൽ രജിസ്റ്റർ ചെയ്യണം. ഉദ്യോഗാർത്ഥികൾ അവരുടെ വിദ്യാഭ്യാസ യോഗ്യത, നൈപുണ്യം, അനുഭവപരിചയം എന്നിവ അടിസ്ഥാനമാക്കിയുള്ള പ്രൊഫൈൽ രജിസ്‌ട്രേഷനാണ് നടത്തേണ്ടത്. തുടർന്ന് വെർച്വൽ ജോബ് ഫെയർ മോഡ് തിരഞ്ഞെടുക്കണം. പുതുക്കിയ വിവരങ്ങൾ, ബയോഡാറ്റ എന്നിവ അപ്‌ലോഡ് ചെയ്ത് ശേഷം അവരവരുടെ പ്രൊഫൈലുമായി പൊരുത്തപ്പെടുന്ന തൊഴിൽ വാഗ്ദാനങ്ങൾ തിരഞ്ഞെടുക്കാം. റോബോട്ടിക് അഭിമുഖത്തിലും, ഓട്ടോമാറ്റിക് പ്രതികരണ മൂല്യനിർണയത്തിലും ഉദ്യോഗാർത്ഥികൾക്ക് പങ്കെടുക്കാം. ഇതിന്റെ അടിസ്ഥാനത്തിൽ വിവിധ ജോലികൾക്കുള്ള തീയതിയും സമയവും ഇമെയിൽ വഴി അറിയിക്കും.