കളമശേരി: വ്യവസായ സംരംഭകർക്ക് അംഗീകാരപത്രം നൽകുന്ന കെ - സ്വിഫ്റ്റ് പോർട്ടലിന്റെ പുതിയ സംവിധാനത്തിന്റെ ലോഞ്ചിംഗ് കളമശേരി കീഡ് ഓഫീസിൽ മന്ത്രി പി. രാജീവ് നിർവഹിച്ചു. സൂക്ഷ്മ ചെറുകിട ഇടത്തര സംരംഭങ്ങൾ എന്ന വിഭാഗത്തിന്റെ നിർവചനപ്രകാരമുള്ള നിക്ഷേപപരിധി 10 കോടിയിൽ നിന്ന് 50 കോടിയാക്കിയതിനെ തുടർന്നാണ് പോർട്ടലിൽ മാറ്റം വരുത്തിയത്. നേരത്തെ 10 കോടിയിൽ താഴെ മുതൽമുടക്കു വരുന്നതും മലിനീകരണ നിയന്ത്രണ ബോർഡിന്റെ ചുവപ്പു വിഭാഗത്തിൽ പെടാത്തതുമായ സംരംഭങ്ങൾക്കാണ് കെ-സ്വിഫ്റ്റിലൂടെ അംഗീകാരപത്രം നൽകിയിരുന്നത്. 15,600ൽ കൂടുതൽ സൂക്ഷ്മ-ചെറുകിട-ഇടത്തരം സംരംഭങ്ങൾ പോർട്ടലിലൂടെ അംഗീകാരപത്രം നേടിയിട്ടുണ്ട്. 3000 കോടിയലധകം നിക്ഷേപവും കേരളത്തിൽ ഇതുവഴി ലഭിച്ചു. വ്യവസായകേന്ദ്രം ജനറൽ മാനേജർ ബിജു. പി.എബ്രഹാം, കെ.എസ്.ഐ.ഡി.സി എ.ജി.എം വർഗീസ് മാലക്കാരൻ എന്നിവരും ചടങ്ങിൽ പങ്കെടുത്തു.