ഒരു മനുഷ്യന് കുളിക്കാതെ എത്ര ദിവസം ജീവിക്കാൻ കഴിയും. ഒരു ദിവസം അല്ലെങ്കിൽ രണ്ടു ദിവസം എന്നായിരിക്കും പലരുടേയും ഉത്തരം. എന്നാൽ പലർക്കും അതുപോലും സാധിക്കണമെന്നില്ല. ഈ സാഹചര്യത്തിലാണ് ഇറാനിലെ ഹാജി എന്ന വ്യക്തി വ്യത്യസ്തനാകുന്നത്. 87 കാരനായ ഈ മനുഷ്യൻ കുളിക്കാതെ ജീവിക്കാൻ തുടങ്ങിയിട്ട് 67 വർഷങ്ങളായി.

ചാരവും ചെളിയും നിറഞ്ഞ ശരീരവുമായി ജീവിക്കുന്ന ഇയാളെ കണ്ടാൽ ചിലപ്പോൾ ഒരു പ്രതിമയാണോ എന്ന് പോലും ആളുകൾ സംശയിക്കാൻ ഇടയുണ്ട്. വെള്ളത്തിനോടുള്ള ഭയമാണ് ഹാജിയെ ഏഴ് പതിറ്റാണ്ടുകളോളം കുളിക്കാത്ത മനുഷ്യനാക്കിയത്. കുളിച്ചാൽ തനിക്ക് സുഖമില്ലാതെ ആകുമെന്നും വൃത്തി തന്നെ രോഗിയാക്കുമെന്നുമാണ് ഹാജി വിശ്വസിക്കുന്നത്.

ഇറാനിലെ ഒറ്റപ്പെട്ട ദ്വീപിൽ വർഷങ്ങളായി ജീവിച്ചുവരുന്ന ഇയാൾ പുകവലിക്ക് അടിമയാണ്. പക്ഷേ ഇയാൾ പുകവലിക്കായി ഉപയോഗിക്കുന്നത് മൃഗങ്ങളുടെ ഉച്ഛിഷ്ടമാണെന്ന് മാത്രം. ചീഞ്ഞ് പോയ മൃഗങ്ങളുടെ മാംസമാണ് ഇയാളുടെ ഇഷ്ട ഭക്ഷണം.

ശൈത്യകാലത്ത് തണുപ്പിൽ നിന്ന് രക്ഷനേടാൻ ഇയാൾ ഹെൽമറ്റ് ധരിക്കാറുണ്ട്. മണ്ണിൽ കുഴിയുണ്ടാക്കിയാണ് വാസം. അതിലൂടെ കടന്നുപോകുന്ന വാഹനങ്ങളുടെ കണ്ണാടിയിൽ നോക്കി തന്റെ സൗന്ദര്യവും അദ്ദേഹം ആസ്വദിക്കും. മുടി വളരുമ്പോൾ അവ തീയിട്ട് കരിച്ച് കളയുകയാണ് പതിവ്.