തിരുവനന്തപുരം: പൊലീസിനെതിരെയുള്ള ആരോപണങ്ങളും പരാതികളും ശക്തമാകുന്ന സാഹചര്യത്തിൽ മുതിർന്ന പൊലീസ് ഉദ്യോഗസ്ഥരുടെ യോഗം വിളിച്ച് മുഖ്യമന്ത്രി പിണറായി വിജയൻ. ഇന്ന് ഉച്ചയ്ക്ക് മൂന്നിന് ക്ലിഫ് ഹൗസിലാണ് യോഗം. സംസ്ഥാന പൊലീസ് മേധാവി, ഹെഡ് ക്വാർട്ടേഴ്സിലെ എഡിജിപിമാർ അടക്കമുള്ള ഉദ്യോഗസ്ഥർ യോഗത്തിൽ പങ്കെടുക്കും.

കോവളത്ത് വിദേശിയെ അപമാനിച്ച സംഭവം വിവാദമായിരുന്നു. ഇതിന് പിന്നാലെയാണ് ഇന്ന് ട്രെയിനിൽ വച്ച് പൊലീസ് ഉദ്യോഗസ്ഥൻ യാത്രക്കാരനെ മർദ്ദിച്ചത്. എസ്ഐ പ്രമോദാണ് മാവേലി എക്സ്പ്രസിൽ വച്ച് യാത്രക്കാരനെ മർദ്ദിച്ചത്. യാതൊരു പ്രകോപനവുമില്ലാതെ എസ്ഐ യാത്രക്കാരനെ ബൂട്ടിട്ട് ചവിട്ടുന്നതിന്റെയും മർദ്ദിക്കുന്നതിന്റെയും ദൃശ്യങ്ങൾ പുറത്തു വന്നിരുന്നു. ഇതിന് പിന്നാലെയാണ് യോഗം വിളിച്ചു ചേർത്തിരിക്കുന്നത്.