സ്ത്രീകളും പുരുഷന്മാരും ഒരുപോലെ ധരിക്കുന്ന വസ്ത്രമാണ് ജീൻസ്. മറ്റു വസ്ത്രങ്ങളെക്കാൾ കംഫർട്ടബിളാണ് എന്നതും ഒരെണ്ണം വാങ്ങിക്കഴിഞ്ഞാൽ ദീർഘകാലം ഉപയോഗിക്കാം എന്നതുമാണ് ഇതിന്റെ പ്രധാന കാരണം. എന്നാൽ സ്ത്രീകളുടെ ജീൻസ് പുരുഷന്മാരുടേതുമായി താരതമ്യപ്പെടുത്തുമ്പോൾ വ്യത്യസ്തമാണ്. ശരീര വടിവ് ഇതിനൊരു കാരണമാണ്.

പുരുഷന്മാരുടെ ജീൻസിനെ അപേക്ഷിച്ച് സ്ത്രീകളുടെ ജീൻസിന് ചെറിയ പോക്കറ്റുകളാണ് എന്നത് നിങ്ങൾ ശ്രദ്ധിച്ചിട്ടുണ്ടോ? പുരുഷന്മാരുടെ ജീൻസിലെ പോക്കറ്റുകൾക്ക് സെൽ ഫോണുകൾ, പേഴ്സുകൾ, താക്കോലുകൾ തുടങ്ങിയവ ഉൾക്കൊള്ളാനുള്ള കഴിവുണ്ട്. അതേസമയം സ്ത്രീകളുടെ ജീൻസിന്റെ പോക്കറ്റുകൾ ഒരു നാണയം വയ്ക്കാൻ പോലും കഴിയാത്തത്രയും ചെറുതാണ്. ചില ജീൻസുകളിൽ പോക്കറ്റുകൾ കാണുകയുമില്ല. എന്തുകൊണ്ടാണ് ഇങ്ങനെ ? സ്ത്രീകളുടെ ജീൻസിൽ ഇങ്ങനെയൊരു വ്യത്യാസം വരാൻ കാരണം എന്താണെന്ന് നോക്കാം.

വസ്ത്ര കമ്പനികൾക്ക് ലാഭമുണ്ടാക്കുക എന്നതാണ് ഒന്നാമത്തെ പ്രധാന കാരണം. ചെറിയ പോക്കറ്റുകൾ വയ്ക്കുമ്പോൾ അല്ലെങ്കിൽ പോക്കറ്റുകൾ വയ്ക്കാതിരിക്കുമ്പോൾ അത്രയും തുണിയുടെ ചിലവ് കമ്പനിക്ക് കുറഞ്ഞു കിട്ടുകയാണ്. അതുകൊണ്ടാണ് പലപ്പോഴും സ്ത്രീകളുടെ ജീൻസിൽ കമ്പനികൾ പോക്കറ്റുകൾ വയ്ക്കാത്തത്.

രണ്ടാമത്തെ കാരണം അടിക്കടി മാറിക്കൊണ്ടിരിക്കുന്ന ഫാഷൻ ട്രെൻഡുകളാണ്. ഇപ്പോഴത്തെ ജീൻസ് പലതും ശരീരത്തോട് പറ്റിപ്പിടിച്ച് കിടക്കുന്നതാണ്. അവയിൽ വലിയ പോക്കറ്റുകൾ പിടിപ്പിച്ചാൽ ആ വസ്ത്രത്തിന്റെ മുഴുവൻ ഭംഗിയും നശിക്കുന്ന അവസ്ഥയിലേയ്ക്ക് മാറും.

മൂന്നാമത്തെ കാരണം സ്ത്രീകളുടെ ജീൻസിൽ വലിയ പോക്കറ്റുകൾ വച്ചു പിടിപ്പിച്ചാലും, ധരിച്ചുകഴിയുമ്പോൾ പോക്കറ്റിന്റെ ഭാഗം വലിയുകയും അങ്ങനെ അതിൽ സാധനങ്ങൾ വയ്ക്കാൻ സ്ഥലമില്ലാതാവുകയും ചെയ്യും . അതിലൂടെ പോക്കറ്റുകൊണ്ട് പ്രയോജനമില്ലാത്ത അവസ്ഥയാകും.

നാലാമത്തെ കാരണം, സ്ത്രീകളുടെ ജീൻസിൽ ഉപയോഗശൂന്യമായ പോക്കറ്റുകൾ വയ്ക്കുമ്പോൾ മൊബൈൽ ഉൾപ്പെടെയുള്ള വസ്തുക്കൾ വയ്ക്കാൻ സ്ഥലമില്ലാതായി മാറും. അങ്ങനെ ബാഗുകൾ ഒഴിച്ചുകൂടാൻ കഴിയാത്ത വസ്തുവാകും. അതിലൂടെ ഹാന്റ് ബാഗുകളുടെ വിൽപ്പനയെ പ്രോത്സാഹിപ്പിക്കാനുള്ള മാർഗം കൂടിയായാവും ഇത് .