അഹമ്മദാബാദ്: വിദ്വേഷ പ്രസംഗങ്ങൾക്കും വർഗീയ കലാപങ്ങൾക്കുമെതിരെ പ്രതികരിക്കണമെന്നാവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് അഹമ്മദാബാദ്, ബംഗളൂരു എന്നിവിടങ്ങളിലെ ഇന്ത്യൻ ഇൻസ്റ്റിറ്റ്യൂട്ട് ഒഫ് മാനേജ്‌മെന്റിലെ വിദ്യാർത്ഥികളും അദ്ധ്യാപകരും പ്രധാനമന്ത്രി നരേന്ദ്ര മോദിയ്ക്ക് കത്തെഴുതി. ഉത്തരാഖണ്ഡിലെ ഹരിദ്വാറിൽ ഹിന്ദു സംഘടനകളും സന്യാസിമാരും സംഘടിപ്പിച്ച മതപാർലമെന്റിൽ വംശഹത്യയ്ക്ക് ആഹ്വാനം ചെയ്ത സംഭവം വിവാദമായിരുന്നു. ഇതിന് പിന്നാലെയാണ് ഐ.ഐ.എം കത്തയച്ചിരിക്കുന്നത്.

പ്രധാനമന്ത്രിയുടെ മൗനം വിദ്വേഷ പ്രസംഗം നടത്തുന്നവർക്ക് പ്രോത്സാഹനമാകുന്നു. വിദ്വേഷ പ്രസംഗങ്ങളും മറ്റു മതങ്ങളെ ആക്രമിക്കാനുള്ള ആഹ്വാനങ്ങളും അംഗീകരിക്കാൻ കഴിയില്ല. ഏത് മതത്തിലും വിശ്വസിക്കാനുള്ള സ്വാതന്ത്ര്യം ഭരണഘടന ഉറപ്പുനൽകുന്നുണ്ട്. രാജ്യത്ത് ഭീതിയുടെ അന്തരീക്ഷമാണ്. ആരാധനാലയങ്ങൾ പോലും ആക്രമിക്കപ്പെടുന്നു.

വിഘടിപ്പിക്കാൻ ശ്രമിക്കുന്ന ശക്തികൾക്കെതിരെ പ്രധാനമന്ത്രി പ്രതികരിക്കാൻ തയാറാകണമെന്നും കത്തിൽ പറയുന്നു. വിദ്യാർത്ഥികളും അദ്ധ്യാപകരും ഉൾപ്പെടെ 183 പേരാണ് കത്തിൽ ഒപ്പുവച്ചിരിക്കുന്നത്.