മംഗളൂരു: വധുവിന്റെ വീട്ടിലേക്ക് വരനെ വേഷം കെട്ടിച്ചും ആഭാസനൃത്തം ചെയ്യിപ്പിച്ചും കൊണ്ടുവന്ന സംഭവത്തിൽ വരനും സുഹൃത്തുകൾക്കുമെതിരേ പൊലീസ് കേസെടുത്തു. ദക്ഷിണ കന്നഡയിലെ ഹിന്ദു ആരാധന ദൈവമായ കൊറഗജ്ജയുടെ വേഷം കെട്ടിച്ചു എന്ന് ആരോപിച്ച് ഹൈന്ദവ സംഘടനാ പ്രവർത്തകൻ നൽകിയ പരാതിയിലാണ് മലയാളിയായ വരനും സുഹൃത്തുക്കൾക്കുമെതിരെ കേസെടുത്തിരിക്കുന്നത്.

കാസർകോട് ഉപ്പളയിലെ വരന്റെ വീട്ടിൽ നിന്ന് ദക്ഷിണ കന്നഡ വിട്‌ളയിലെ വധുവിന്റെ വീട്ടിലേക്ക് പോകുമ്പോഴായിരുന്നു വരനെ ഇത്തരത്തിൽ വേഷം കെട്ടിച്ചത്. വരന്റെ ശരീരം മുഴുവൻ ചായം പൂശുകയും കൊറഗജ്ജ വേഷം അണിയിപ്പിക്കുകയുമായിരുന്നു. രാത്രി വരൻ പോകുന്ന ചടങ്ങിനിടെ നടന്ന ആഹ്ലാദ പ്രകടനത്തിന്റെ വീഡിയോ സമൂഹ മാദ്ധ്യമങ്ങളിൽ വൈറലായി. ഇതിനെ തുടർന്ന് നിരവധി പ്രതിഷേധങ്ങൾ ഉയർന്നിരുന്നു. ഇതിന് പിന്നാലെ ഹൈന്ദവ സംഘടനാ പ്രവർത്തകർ പരാതിപ്പെടുകയും കർണാടക പൊലീസ് കേസെടുക്കുകയുമായിരുന്നു.