രാത്രി ഉറങ്ങാൻ സമയമായാലും സ്‌മാർട്ഫോണും സ്‌ക്രോൾ ചെയ്‌ത് ഇരിക്കുന്ന ശീലക്കാരാണ് നമ്മളിൽ മിക്കവരും. സ്‌മാർട്ഫോൺ പല ഉപകാരവും ചെയ്യുന്ന സ്‌മാർട് സഹായിയാണെങ്കിലും ഉറക്കത്തിന്റെ കാര്യത്തിൽ അങ്ങനെയല്ല എന്ന് ധാരാളം പഠനങ്ങൾ തന്നെ സൂചിപ്പിക്കുന്നുണ്ട്.
സുഖമുള‌ള ഉറക്കം കിട്ടാൻ സ്‌മാർട്ഫോണിലെ ഈ ആപ്പുകൾ ചുരുങ്ങിയത് ഉറക്കത്തിന് രണ്ട് മണിക്കൂർ മുൻപെങ്കിലും ഉപയോഗിക്കുന്നത് നിർത്തണം എന്നാണ് ഒരു സർവെ അഭിപ്രായപ്പെടുന്നത്. 2012 മുതിർന്നവരിൽ നടത്തിയ പഠനത്തിൽ പലതരം ആപ്പുകൾക്ക് ഉറക്കത്തിൽ വലിയ സ്വാധീനമുണ്ടെന്ന് കണ്ടെത്തി.
ഉറക്കം തടയുന്ന ഏറ്റവും പ്രധാനപ്പെട്ട ആപ്പ് ടിക്‌ടോക് ആണെന്നാണ് സർവെയിൽ കണ്ടെത്തിയത്. രാത്രി ഉറങ്ങാൻ കിടക്കുമ്പോൾ ടിക്‌ടോക് കാണുന്നവർ ഇത്തരത്തിൽ ആപ്പുകൾ നോക്കാതെ ഉറങ്ങുന്നവരെക്കാൾ 24 ശതമാനം കൂടുതൽ ക്ഷീണിതരായിരിക്കുമെന്നാണ് കണ്ടെത്തിയത്.
ഉറങ്ങാനെടുത്ത സമയവും ഉറക്കംപിടിക്കുന്നതിന് എടുക്കുന്ന സമയവും സർവെയിൽ പഠനവിധേയമാക്കി. ഇത്തരത്തിൽ പഠനവിധേയമാക്കിയപ്പോൾ ഉറക്കം തടസപ്പെടുത്തുന്നതിൽ ഒന്നാമത് ടിക്‌ടോകും രണ്ടാമത് ഇൻസ്‌റ്റഗ്രാമുമാണെന്ന് കണ്ടെത്തി. ടിക്‌ടോക് ഉപയോഗിക്കുന്നവർ ഉറങ്ങാൻ വൈകുന്നത് ഒരു മണിക്കൂർ ഏഴ് മിനുട്ട് സമയമെടുത്താണ്. ഇൻസ്‌റ്റഗ്രാം ഉപയോഗിക്കുന്നവരിൽ ഇത് 58 മിനുട്ടാണ്.
ഉറങ്ങുന്നതിന് മുൻപ് ഉപയോഗിക്കുന്ന വളരെ മോശം ആപ്പാണ് ടിക്‌ടോകെന്ന് സർവെ അഭിപ്രായപ്പെടുന്നു. ഉറക്കത്തിന് രണ്ട് മണിക്കൂർ മുൻപ് ഫോൺ ഉപയോഗിക്കുന്നത് അവസാനിപ്പിക്കണം. ഫോണിലെ നീല വെളിച്ചം ഉറക്കം തടസപ്പെടാൻ കാരണമാകും. ഇതുവഴി ശാരീരികവും മാനസികവുമായി മോശം ആരോഗ്യാവസ്ഥയ്‌ക്കും കാരണമാകും.
2020ൽ ഇത്തരത്തിൽ ജനങ്ങളുടെ ഉറക്കത്തിന്റെ കാര്യത്തിൽ 78 ശതമാനം കുറവുണ്ടായതായെന്ന് ഉറക്കത്തെക്കുറിച്ച് പഠനം നടത്തുന്ന ഗവേഷക ഡൊറോത്തി ചേമ്പേഴ്‌സ് അറിയിക്കുന്നു. ഇത്തരം ചിട്ടകൾക്ക് പകരം ഉറക്കം വരാനും മനസിനെ ശാന്തമാക്കുന്നതുമായ തരത്തിൽ പുസ്‌തക വായന, പാട്ട് കേൾക്കുക എന്നിങ്ങനെയുള‌ളവ ചെയ്യുന്നത് നല്ലതാണ്.