കണ്ണൂർ: മാടായിപ്പാറയിൽ പിഴുതുമാറ്റിയ കെ റെയിൽ സർവ്വേ കല്ലിന്റെ ചിത്രം ഫേസ്ബുക്കിൽ പങ്കുവച്ചതിന് പൊലിസ് കേസെടുത്തതിനെതിരെ നിയമ നടപടിക്ക് ഒരുങ്ങി യൂത്ത് കോൺഗ്രസ്. സിപിഎം പ്രവർത്തകൻ ജനാർദ്ധൻ നൽകിയ പരാതിയിലാണ് ചെറുകുന്ന് യൂത്ത് കോൺഗ്രസ് മണ്ഡലം പ്രസിഡന്‍റ് പുത്തൻപുരയിൽ രാഹുലിനെതിരെ പഴയങ്ങാടി പൊലീസ് കേസെടുത്തത്.

തനിക്കെതിരെ മാത്രം കലാപാഹ്വാനത്തിന് കേസെടുത്തത് മനപൂർവമാണ്. പൊലീസ് നടപടി അഭിപ്രായ സ്വാതന്ത്ര്യത്തിന് നേരെയുള്ള കടന്നുകയറ്റമാണെന്നും പരാതി കൊടുത്ത ആൾക്കെതിരെ മാനനഷ്ടത്തിന് കേസ് കൊടുക്കുമെന്നും രാഹുല്‍ പറഞ്ഞു. എത്ര കേസെടുത്താലും ഫേസ്ബുക്ക് പോസ്റ്റ് പിൻവലിക്കില്ലെന്നും അദ്ദേഹം വ്യക്തമാക്കി.

സംഭവത്തിൽ പ്രതിഷേധിച്ച് യൂത്ത് കോൺഗ്രസ് പ്രവർത്തകർ കഴിഞ്ഞ ദിവസം പഴയങ്ങാടി പൊലീസ് സ്റ്റേഷനിലേക്ക് മാർച്ച് നടത്തിയിരുന്നു. മാർച്ചിന് നേരെ പൊലീസ് ജലപീരങ്കി പ്രയോഗിച്ചു. യൂത്ത് കോൺഗ്രസ് ജില്ലാ പ്രസിഡണ്ട് സുധീപ് ജെയിംസാണ് മാർച്ച് ഉദ്ഘാടനം ചെയ്തത്.