തിരുവനന്തപുരം: കെ റെയിൽ പദ്ധതിയുടെ ഡി പി ആർ പുറത്ത്. ആറ് വോള്യങ്ങളായി 3773 പേജുകളുള്ള പഠന റിപ്പോർട്ടാണ് ഇപ്പോൾ പുറത്തുവന്നിരിക്കുന്നത്. പരിസ്ഥിതി ആഘാത പഠനവുമായി ബന്ധപ്പെട്ട വിവരങ്ങളും ഡി പിആറിലുണ്ട്. തിരുവനന്തപുരത്തെ സെന്റര്‍ ഫോര്‍ എന്‍വയോണ്‍മെന്റ് ആന്‍ഡ് ഡെവലെപ്‌മെന്റ് ആണ് പരിസ്ഥിതി ആഘാതവുമായി ബന്ധപ്പെട്ട വിശദമായ പഠനം നടത്തിയത്. സില്‍വര്‍ ലൈന്‍ കടന്നുപോകുന്ന പ്രദേശത്തെ മുഴുവന്‍ സസ്യജാലങ്ങള്‍ക്കും എന്ത് സംഭവിക്കുമെന്ന് ഈ പഠനം വ്യക്തമാക്കുന്നുണ്ട്. 320 പേജുള്ളതാണ് ഈ പഠന റിപ്പോർട്ട്.
പദ്ധതി നിലവിൽ വരുമ്പോൾ പൊളിക്കേണ്ട കെട്ടിടങ്ങളുടെ എണ്ണവും പൊളിക്കേണ്ട ദേവാലയങ്ങളുടെ ചിത്രങ്ങളും ഉൾപ്പെടെ ഡിപിആറിൽ വ്യക്തമാക്കുന്നുണ്ട്. ട്രാഫിക് സര്‍വേ, ജിയോ ടെക്‌നിക്കല്‍ ഇന്‍വെസ്റ്റിഗേഷന്‍ റിപ്പോര്‍ട്ട്, ടോപ്പോഗ്രാഫിക് സര്‍വേ എന്നിവയും ഡി.പി.ആറിന്റെ ഭാഗമാണ്.
പദ്ധതി നടപ്പിലാക്കിയാൽ ഉണ്ടാകുന്ന ഇന്ധന ലാഭം, സമയ ലാഭം എന്നിവയുടെ വിശദമായ വിവരങ്ങൾ നൽകുന്ന 203 പേജുള്ള ട്രാഫിക് സര്‍വേയും ഡിപിആറിലുണ്ട്. 974 പേജുള്ള ജിയോ ടെക്‌നിക്കല്‍ ഇന്‍വെസ്റ്റിഗേഷന്‍ റിപ്പോര്‍ട്ടും 470 പേജുള്ള ട്രോപ്പോഫിക്കല്‍ സര്‍വേയും ഡിപിആറിന്റെ ഭാഗമാണ്. പദ്ധതി നടപ്പിലായാൽ ഉണ്ടാകുന്ന നേട്ടങ്ങളെ കുറിച്ച് വിശദമാക്കുന്ന ഫീസിബിള്‍ സ്റ്റഡി റിപ്പോര്‍ട്ടും ഡിപി ആറിൽ ഉൾപ്പെടുന്നു.