കുഴഞ്ഞുവീണുള്ള മരണത്തിന് പ്രധാന കാരണം കൊറോണറി ഹൃദ്രോഗമാണ്. രോഗത്തെ പ്രതിരോധിക്കാനുള്ള പ്രധാന മാർഗം ആരോഗ്യകരമായ ജീവിതശൈലിയാണ്. ആരോഗ്യകരമായ ഭക്ഷണം, വ്യായാമം, സമ്മർദ്ദരഹിതമായ ജീവിതം എന്നിവയെല്ലാം ഒരുപോലെ പ്രാധാന്യം അർഹിക്കുന്നു. രോഗമുണ്ടെങ്കിൽ അത് അപകടകരമാകാതിരിക്കാനും ശ്രദ്ധിക്കണം. പരിശോധനകളും കൃത്യസമയത്തെ ചികിത്സയും കൊണ്ട് അപകടം ഒഴിവാക്കാം.

കൊഴുപ്പുള്ള ആഹാരം, അമിത മദ്യപാനം, പുകവലി എന്നിവ പാടേ ഉപേക്ഷിക്കണം. ദിവസവും അരമണിക്കൂർ നടക്കുക. ഡോക്ടറുടെ നിർദേശപ്രകാരം മാത്രമേ ട്രെഡ് മില്ല് ഉപയോഗിക്കാവൂ.

ഹൃദ്രോഗലക്ഷണങ്ങൾ അവഗണിക്കരുത്. ചെറിയ രീതിയിലുണ്ടാകുന്ന നെഞ്ചിടിപ്പ്, പെട്ടെന്നു മാറുന്ന തലകറക്കം, ബോധക്ഷയം എന്നിവയെ നിസാരമായി കാണരുത്. ആയാസമുളവാക്കുന്ന പ്രവൃത്തികൾ ചെയ്യുന്നവർ കൃത്യമായ ഇടവേളകളിൽ ഹൃദയപരിശോധന നടത്തണം. ഹൃദയസ്തംഭന സാദ്ധ്യതയുള്ളവർക്കും കൃത്യമായ വൈദ്യപരിശോധന ആവശ്യമാണ്. പ്രമേഹം, രക്തസമ്മർദ്ദം എന്നിവ നിയന്ത്രണവിധേയമാക്കുക. യോഗ, ധ്യാനം എന്നിവ ശീലിക്കുക. ഹൃദ്രോഗമുള്ളവർ പടികൾ കയറുകയോ ആയാസമുള്ള വ്യായാമരീതികൾ പിന്തുടരുകയോ അരുത്.