മലപ്പുറം: കെ റെയിലിനെതിരായ വിമർശനങ്ങളെ സർക്കാർ ഗൗരവമായി കാണുമെന്നും ഡിപിആറിൽ ആവശ്യമെങ്കിൽ മാറ്റം വരുത്തുമെന്നും മന്ത്രി എം വി ഗോവിന്ദൻ. കെ റെയിലിനെതിരായ പ്രതിപക്ഷത്തിന്റെ ആശങ്കകൾ ശരിയാണെന്ന് തെളിഞ്ഞതായി പ്രതിപക്ഷ നേതാവ് വി ഡി സതീശനും പ്രതികരിച്ചു. ഡിപിആർ ഇതുവരെ മറച്ചുവച്ചത് ദുരൂഹമാണെന്ന് മെട്രോമാൻ ഇ ശ്രീധരനും കുറ്റപ്പെടുത്തി.
വിമര്‍ശനങ്ങളെ സര്‍ക്കാര്‍ ഗൗരവപൂര്‍വമാണ് പരിഗണിക്കുന്നതെന്നും എന്തൊക്കെ മാറ്റങ്ങള്‍ വരുത്തണോ അതെല്ലാം വരുത്തിക്കൊണ്ട് മുന്നോട്ട് പോകുമെന്നും പദ്ധതി സംബന്ധിച്ച വിശദീകരണ യോഗത്തില്‍ അദ്ദേഹം പറഞ്ഞു.
പ്രകൃതിക്ക് യാതൊരു കോട്ടവും തട്ടാതെ, ഗ്രീന്‍ പ്രോട്ടോക്കോള്‍ അനുസരിച്ച് പാരിസ്ഥിതിക സൗഹൃദത്തെ അടിസ്ഥാനപ്പെടുത്തി, ജനങ്ങള്‍ക്ക് നേട്ടം ഉണ്ടാക്കിക്കൊടുക്കാന്‍, വമ്പിച്ച രീതിയില്‍ മുന്നോട്ട് കുതിക്കാനുള്ള പ്രാപ്തി നേടാന്‍ ഈ പരിപാടി നമുക്ക് അത്യാവശ്യമുള്ള ഒന്നാണെന്ന് മന്ത്രി പറഞ്ഞു. എന്നാല്‍ വിമര്‍ശനങ്ങളെ ഒരു രീതിയിലും സര്‍ക്കാര്‍ തടയില്ല. വിമര്‍ശനങ്ങളെ ഗൗരവപൂര്‍വമാണ് പരിഗണിക്കുന്നതെന്നും അദ്ദേഹം പറഞ്ഞു.