വണ്ടൂർ: യുവാവിനെ വണ്ടൂർ പുളിക്കലിലെ ബാറിൽ വച്ച് ഗുരുതരമായി മർദ്ദിച്ച് പരിക്കേൽപ്പിച്ച കേസിലെ പ്രതികൾ അറസ്റ്റിൽ. കണ്ണൂർ കൂത്തുപറമ്പ് പാതിരിക്കോട് സ്വദേശികളായ കെ.നവജിത്ത്, ചിരുകണ്ടോത്ത് വീട്ടിൽ പ്രിയേഷ് എന്നിവരാണ് അറസ്റ്റിലായത്.
രണ്ട് മാസം മുമ്പാണ് കേസിനാസ്പദമായ സംഭവം. ബാറിൽ വച്ചുണ്ടായ കലഹത്തിനിടെ ഗുണ്ടകൾ ഇടിക്കട്ട ഉപയോഗിച്ച് ആക്രമിച്ചെന്നാണ് കേസ്. കണ്ണിനു താഴേയും മൂക്കിനും ഗുരുതര പരിക്കേറ്റിട്ടുണ്ടെന്ന് പൊലീസ് പറഞ്ഞു. അഞ്ച് പേർക്കെതിരേയാണ് കേസ്. ആയുധങ്ങളും പിടിച്ചെടുത്തിട്ടുണ്ട്. ഇരുവരും കണ്ണൂരിലെ ഒരു സിപിഎം നേതാവിന്റെ കൊലപാതക കേസിലടക്കം പ്രതികളാണ്. നവജിത്തിന്റെ പേരിൽ 10 ഓളം കേസുകൾ നാട്ടിൽ തന്നെയുണ്ട്. പെരിന്തൽമണ്ണ കോടതിയിൽ ഹാജരാക്കിയ പ്രതികളെ റിമാന്റ് ചെയ്തു.