ഊർജ്ജസ്വലരായ, ചുറുചുറുക്കുള്ള,സാമൂഹിക ബോധമുള്ള യുവതയാണ് ഏത് രാജ്യത്തെയും സന്നദ്ധ രക്തദാതാക്കളിൽ ഭൂരിപക്ഷം. അതുകൊണ്ട് തന്നെ യുവജനങ്ങളുടെ സ്ഥിരമായ പങ്കാളിത്തം രക്തദാനത്തിൽ ഉറപ്പ് വരുത്തേണ്ടത് രക്തലഭ്യതയ്ക്ക് പ്രധാനമാണ്. രക്തദാനത്തിൽ യുവതയുടെ പങ്കാളിത്തം വർദ്ധിപ്പിക്കുന്നതിനായി 1989ൽ സിംബാബെ തുടക്കമിട്ട പദ്ധതിയാണ് ക്ലബ് 25(Pledge 25-പ്രതിജ്ഞ-25).25വയസ്സ് എത്തുന്നതിനു മുൻപായി 25തവണ രക്തദാനം നിർവഹിക്കുമെന്ന് വിദ്യാർത്ഥികൾ പ്രതിജ്ഞ ചെയ്യുന്നതാണ് Pledge-25.ഈ പ്രതിജ്ഞ നിറവേറ്റുന്നതിനായി,സുരക്ഷിത രക്തദാതാവാകേണ്ടതിന്റെ ആവശ്യകതയും അതിനായി പിന്തുടരേണ്ട ജീവിതശൈലിയും വിദ്യാർത്ഥികൾക്ക് പരിചയപ്പെടുത്തുന്നു. അതുവഴി ആരോഗ്യമുള്ള ഒരു സമൂഹത്തെയും വാർത്തെടുക്കാനാകുന്നു.

താരതമ്യേന ചെലവു കുറഞ്ഞ ഈ പദ്ധതി നടപ്പിലാക്കിയത് വഴി രാജ്യത്ത് ആകെ രക്തദാനത്തിന്റെ 70ശതമാനവും വിദ്യാർത്ഥികളിൽ നിന്ന് സ്വീകരിക്കാനും എച്ച്.ഐ.വി അണുബാധയുടെ നിരക്ക് 4.45ശതമാനത്തിൽ നിന്ന് 0.35ശതമാനത്തിലേക്ക് എത്തിക്കാനും സിംബാബ്‌വേയ്‌ക്ക്‌ ആയി.ഈ വിജയത്തെ തുടർന്ന് ഇന്ത്യ, മലാവി, ദക്ഷിണാഫ്രിക്ക, ബോട്സ്വാന,ബംഗ്ലാദേശ്, ഇന്തോനേഷ്യ, ഫിലിപ്പെയൻസ്, സിംഗപ്പൂർ, സ്വിറ്റ്സർലാൻഡ്, ഉഗാണ്ട, സാംബിയ തുടങ്ങിയ രാജ്യങ്ങളും Club-25 പദ്ധതി ആരംഭിച്ചു. രക്തദാനത്തെക്കുറിച്ചുള്ള ശാസ്ത്രീയവും കൃത്യവുമായ വിവരങ്ങൾ, മികച്ച ആരോഗ്യ ശീലങ്ങൾ,എച്ച്.ഐ.വി പ്രതിരോധം എന്നിവ പകർന്നുകൊടുക്കുന്നത് വഴി യുവജനങ്ങളിൽ മികച്ച തീരുമാനമെടുക്കാനുള്ള അവസരങ്ങൾ ഒരുക്കികൊടുക്കുക എന്നതാണ് ക്ലബ് 25ലക്ഷ്യം വയ്ക്കുന്നത്.

ക്ലബ് 25ന്റെ പ്രത്യേകതകൾ

ക്ലബ് 25ന്റെ സുതാര്യമായ ഘടന വിവരങ്ങൾ കൈമാറുന്നതിനും ഏകോപിപ്പിക്കുന്നതിനും ചുമതലകൾ നിർവഹിക്കുന്നതിനും സഹായകമാണ്.
കേന്ദ്രീകൃതമായ ഏകീകരണത്തോടെ യുവസമൂഹത്തിൽ നിന്നുതന്നെ ലാഭേച്ഛയില്ലാത്ത, സന്നദ്ധ രക്തദാന അംബാസിഡർമാരെ വളർത്തിയെടുക്കാനാകുന്നു. സമാന മനസ്കരുമായി ചേർന്ന് പ്രവർത്തിക്കാനുള്ള സൗകര്യം. രക്തദാന ക്യാമ്പുകളിൽ വെച്ച് പരസ്പരം കാണാനും സൗഹൃദം പുതുക്കാനും അവസരം ലഭിക്കുന്നുവെന്നതിനാൽ ക്യാമ്പുകളിലെ പങ്കാളിത്തവും രക്തലഭ്യതയും കൂടുന്നു. മേൽനോട്ടത്തിനും വിലയിരുത്തലിനും സഹായകമാകുന്ന തരത്തിൽ കൃത്യമായ നിയന്ത്രണങ്ങളോടെ പ്രവർത്തനങ്ങൾ നടപ്പിലാക്കാനുള്ള അനുവാദം.
യുവജനങ്ങളുടെ മേഖലകളായ വിവരസാങ്കേതിക വിദ്യ,ഗവേഷണം,പുതുരീതികൾ എന്നിവയുടെ ഗുണഫലങ്ങൾ രക്താനുബന്ധ സേവനങ്ങൾക്കായി ഉപയോഗപ്പെടുത്തൽ. കൃത്യമായി നിരീക്ഷണവും ഘടനയുമുള്ള ഒരു വിഭാഗത്തിന്റെ കീഴിൽ യുവസമൂഹം സുരക്ഷിതരാണെന്ന ബോധം മാതാപിതാക്കളിലും, തത്പര കക്ഷികളിലും ഉറപ്പുവരുത്തൽ. കൂട്ടായ്മയിലൂടെ മൂല്യങ്ങളും അറിവുകളും നേടുന്നതിനുള്ള അവസരമൊരുക്കൽ.

കരസ്ഥമാക്കുന്ന ഗുണങ്ങൾ
സമാന മനസ്കരായ യുവാക്കൾ/യുവതികളുമായി സഹകരിച്ചു പ്രവർത്തിക്കാനുള്ള അവസരം. മികച്ച ജീവിതശൈലി പിന്തുടരുവാനും രക്താനുബന്ധ സേവനങ്ങളിലെ ബുദ്ധിമുട്ടുകളെ നേരിട്ടറിയാനും സഹായിക്കുന്നു. നിസ്വാർത്ഥ,സന്നദ്ധ സാമൂഹിക സേവനത്തിനുള്ള താത്‌പര്യം എന്നിവ വളർത്താനാകുന്നു.
കൂട്ടായ്മകളിലൂടെ പുതിയ അറിവുകളും അനുഭവങ്ങളും കരസ്ഥമാക്കുന്നു. മറ്റുള്ളവരെ സ്വാധീനിക്കാനാകുന്ന വ്യക്തിത്വത്തിന് ഉടമയാകാം.
ക്ഷമ, Approachability, ആത്മവിശ്വാസം എന്നിവ കൈവരിക്കുന്നു.
കേരളത്തിലെ ക്ലബ് 25പ്രവർത്തനങ്ങൾ, കേരളത്തിലെ വിദ്യാഭ്യാസ സ്ഥാപനങ്ങൾ ,എൻ.എസ്.എസ്, എൻ.സി.സി, സയൻസ് ക്ലബ്, യൂണിയൻ എന്നിവ വഴിയും അല്ലാതെയും സന്നദ്ധ രക്തദാതാക്കളുടെ വലിയൊരു കൂട്ടത്തെത്തന്നെ സജ്ജരാക്കുന്നുണ്ട്.

വിദ്യാലയങ്ങളിലെ ക്ലബ്ബുകൾ:പുതുപ്രതീക്ഷ

രക്തദാനത്തിനുള്ള കുറഞ്ഞ പ്രായം 18വയസാണെങ്കിലും സ്കൂൾ വിദ്യാർത്ഥികൾക്കും ( 17വയസ് )ഈ പദ്ധതിയിൽ പങ്കെടുക്കാം അദ്ധ്യാപകരുടെയും രക്ഷാകർത്താക്കളുടെയും സഹായത്തോടെ സന്നദ്ധ രക്തദാന ക്യാമ്പുകളുടെ ഏകോപനത്തിലും (സാധനങ്ങൾ എത്തിക്കുന്നതിലും,രക്തദാതാക്കളുടെ രെജിസ്റ്റർ തയ്യാറാക്കുന്നതിലും) ആരോഗ്യ വിഷയങ്ങളിൽ ക്ലാസുകൾ സംഘടിപ്പിക്കുന്നതിലും സന്നദ്ധ രക്തദാതാക്കൾക്ക് കത്തുകൾ കൈമാറുന്നതിലും ഭാഗമാകാം. വിവിധ സ്കൂളുകൾ ഇത്തരത്തിലുള്ള രക്തദാന ക്യാമ്പുകൾ സംഘടിപ്പിക്കുന്നുണ്ട്. വിദ്യാർത്ഥികൾക്ക് സന്നദ്ധ രക്തദാനത്തിനെക്കുറിച്ചു അവബോധം നൽകുകയും കുറഞ്ഞത് രണ്ട് വ്യക്തികളെയെങ്കിലും രക്തദാനത്തിന് ഇവർ പ്രേരിപ്പിക്കുകയും ചെയ്യുന്നു. രക്തദാന ക്യാമ്പുകളിൽ ഉത്തരവാദിത്തത്തോടെ രക്തദാനത്തിന്റെ നടപടി ക്രമങ്ങൾ പാലിക്കുകയും ഇതുവഴി ശാസ്ത്രീയതയും നിസ്വാർത്ഥതയും ആരോഗ്യ ശീലങ്ങളും കുട്ടികൾ സ്വായത്തമാക്കുകയും ചെയ്യുന്നു.

പദ്ധതിയുടെ നടത്തിപ്പിനാവശ്യം
സമൂഹത്തിൽ നിന്നും രക്തബാങ്കുകളിൽ നിന്നും സംസ്ഥാന തലത്തിൽ നിന്നുമുള്ള സഹകരണം/സഹായം.
പ്രാദേശിക പ്രത്യേകതകൾ കൂടി പരിഗണിച്ചു കൊണ്ടുള്ള പദ്ധതി നടത്തിപ്പ്.
സൂക്ഷ്മവും കൃത്യവുമായ ആസൂത്രണവും നിർവഹണവും
അനുയോജ്യമായ ബഡ്ജറ്റ്.
ഉത്തരവാദിത്വബോധവും സമർപ്പണ മനോഭാവവുമുള്ള ഉദ്യോഗസ്ഥർ/അംഗങ്ങൾ.
കൃത്യമായ നിരീക്ഷണവും വിലയിരുത്തലും.

ക്ലബ് 25ന് കേരളത്തിലുള്ള സാദ്ധ്യതകൾ

സംസ്ഥാനത്തെ Blood Transfusions Services കൃത്യമായ ഘടനയോടുകൂടിയതാണ്. സംസ്ഥാനതലത്തിൽ ഒരു നോഡൽ ഓഫീസറും 14 ജില്ലാ നോഡൽ ഓഫീസർമാരുമാണ് സംസ്ഥാനത്തെ പ്രവർത്തനങ്ങളെ ഏകോപിപ്പിക്കുന്നത്. ജില്ലാ നോഡൽ ഓഫീസർമാർക്ക് സ്കൂൾ കോളേജുതല യൂണിറ്റുകളെയും രക്തബാങ്കുകളെയും ഏകോപിപ്പിക്കുന്നത് വഴി രക്തത്തിന്റെ ആവശ്യകതയും ലഭ്യതയും തമ്മിൽ ബന്ധിപ്പിക്കാനും കഴിയും. അതോടൊപ്പം കേന്ദ്രീകൃതമായി സന്നദ്ധ രക്തദാന ക്യാമ്പുകളും മറ്റ് പരിപാടികളും ആസൂത്രണം ചെയ്യാനും നടപ്പിലാക്കാനും സാധ്യമാണ്.സംസ്ഥാന നോഡൽ ഓഫീസർക്ക്‌ ഈ വിഷയത്തിലാവശ്യമായ administrative സഹായങ്ങൾ നൽകാനും പ്രവർത്തനങ്ങൾ വിലയിരുത്താനും കഴിയും.സമീപ ഭാവിയിൽ ക്ലബ് 25ന്റെ കേരള മാതൃക ഇതായിരിക്കും.

( ലേഖകൻ കുവൈറ്റിൽ മിനിസ്ട്രി ഓഫ് ഹെൽത്തിന്റെ കീഴിൽ കെ.ഒ.സി ഹോസ്പിറ്റലിൽ നഴ്‌സാണ് )