മലപ്പുറം: വാട്ട‌ർ അതോറിട്ടി ഓഫീസിലെ കോമ്പൗണ്ടിൽ കൂട്ടിയിട്ടിരുന്ന പൈപ്പുകളിൽ നിന്നും ഏഴ് പെരുമ്പാമ്പുകളെ പിടികൂടി. രാവിലെ കോമ്പൗണ്ട് വൃത്തിയാക്കുന്നതിനിടെ വാ‌ട്ടർ അതോറിട്ടി ജീവനക്കാരാണ് പാമ്പുകളെ കണ്ടെത്തിയത്. ആദ്യം ഒരു പാമ്പിനെയാണ് കണ്ടെത്തിയത്. തുടർന്ന് നടത്തിയ തെരച്ചിലിലാണ് കൂടുതൽ പാമ്പുകളെ കണ്ടെത്തുന്നത്. മൊത്തം ഏഴ് പാമ്പുകളെയാണ് കോമ്പൗണ്ടിൽ നിന്ന് കണ്ടെത്തിയത്. പിടികൂടിയ പാമ്പുകളെ വനംവകുപ്പിന് കൈമാറി.

റാപ്പി‌ഡ് റെസ്പോൺസ് ടീമിലെ വാളണ്ടിയർമാരാണ് പാമ്പുകളെ പിടികൂടിയത്.

മലപ്പുറം വാട്ടർ അതോറിട്ടി ഓഫീസിന്റെ കോമ്പൗണ്ട് മുഴുവനും കാട് മൂടി കിടക്കുകയാണ്. ഉപയോഗശൂന്യമായ നൂറ്കണക്കിന് പൈപ്പുകൾ ഇതിനിടയിൽ കൂട്ടിയിട്ടിട്ടുമുണ്ട്. ഇവിടെ തെരച്ചിൽ നടത്തിയാൽ കൂടുതൽ പാമ്പുകളെ കണ്ടെത്താൻ സാധിക്കുമെന്നും എത്രയും പെട്ടെന്ന് കോമ്പൗണ്ട് വൃത്തിയാക്കാനുള്ള നടപടികൾ അധികൃതർ സ്വീകരിക്കണമെന്നും ജീവനക്കാർ ആവശ്യപ്പെട്ടു.