ന്യൂഡൽഹി: പ്രധാനമന്ത്രി നരേന്ദ്ര മോദിയുടെ അഭിസംബോധനയെ പരിഹസിച്ച് ശശി തരൂർ എം പി. മോദി പ്രസംഗങ്ങളിൽ പതിവായി ഉപയോഗിക്കുന്ന ' ഓ മിത്രോം' കൊവിഡിന്റെ പുതിയ വകഭേദമായ ഒമിക്രോണിനേക്കാൾ മാരകമാണെന്ന് തരൂർ ട്വിറ്ററിൽ കുറിച്ചു.

"ഒമിക്രോണിനേക്കാൾ വളരെയധികം അപകടകാരിയാണ് ഓ മിത്രോം. ഇതിന്റെ അനന്തരഫലങ്ങൾ ദിവസേന നാം ധ്രുവീകരണ വർദ്ധനവ്, വിദ്വേഷം, മതഭ്രാന്ത് എന്നിവയുടെ പ്രോത്സാഹനം, ഭരണഘടനയ്ക്കെതിരായ ആക്രമണങ്ങൾ, ജനാധിപത്യത്തെ ദുർബലപ്പെടുത്തൽ എന്നിവയിൽ അളക്കുകയാണ്. ഈ വൈറസിന് തീവ്രത കുറഞ്ഞ മറ്റ് വകഭേദങ്ങളില്ല"-തരൂർ കുറിച്ചു.

Far more dangerous than #Omicron is “O Mitron”! We are measuring the consequences of the latter every day in increased polarisation, promotion of hatred & bigotry, insidious assaults on the Constitution & the weakening of our democracy. There is no “milder variant” of this virus.

— Shashi Tharoor (@ShashiTharoor) January 31, 2022

ധ്രുവീകരണ വിഷയത്തിൽ ശശി തരൂർ സർക്കാരിനെ കടന്നാക്രമിക്കുക പതിവാണ്. കഴിഞ്ഞ ദിവസം തരൂർ ഉത്തർപ്രദേശ് മുഖ്യമന്ത്രിയുടെ ഒരു വീഡിയോ പങ്കിട്ട് വർഗീയ ധ്രുവീകരണം ആരോപിച്ചിരുന്നു. ഉത്തർപ്രദേശ് മുഖ്യമന്ത്രിക്ക് താൻ രാജ്യത്തിന് എത്രമാത്രം നാശമുണ്ടാക്കിയെന്ന് അറിയില്ല എന്നായിരുന്നു വീഡിയോ പങ്കുവച്ച് തരൂർ കുറിച്ചത്.