മലപ്പുറം: പ്രാദേശിക തനിമയുള്ള ഉത്സവങ്ങളും ഉത്പന്നങ്ങളും കൂട്ടിയിണക്കി ഉത്തരവാദിത്വ ടൂറിസം മിഷൻ പാക്കേജുകളും ഉത്പന്ന വിപണന ശൃംഖലയും ആരംഭിക്കുന്നു. കോവിഡാനന്തര ടൂറിസത്തിന്റെയും ന്യൂ നോർമൽ ടൂറിസത്തിന്റെയും സാദ്ധ്യതകൾ പരമാവധി ഉപയോഗപ്പെടുത്താൻ ലക്ഷ്യമിട്ടാണ് പുതിയ പദ്ധതി. പ്രാദേശിക തനിമയുള്ള ഉത്പന്നങ്ങൾ (ഉദാ: ആറന്മുള കണ്ണാടി, പയ്യന്നൂർ പവിത്രമോതിരം ), കാർഷികവിളകൾ (ഉദാ: ഞവര, ജീരകശാല, ഗന്ധകശാല), ഭക്ഷ്യവിഭവങ്ങൾ (ഉദാ: രാമശ്ശേരി ഇഡ്ഢലി , മറയൂർ ശർക്കര ), പ്രത്യേകതയുള്ള ഉത്സവങ്ങൾ (ഉദാ: ആറ്റ് വേല, കെട്ടുകാഴ്ചകൾ ) എന്നിവ കോർത്തിണക്കിയുള്ള ടൂർ പാക്കേജുകളും ഉത്പന്ന വിപണന ശൃംഖലയും ഉത്തരവാദിത്വ ടൂറിസം മിഷൻ തയാറാക്കി തദ്ദേശീയ, വിദേശ, വിനോദസഞ്ചാരികൾക്ക് അനുഭവവേദ്യമാക്കുകയാണ് ലക്ഷ്യം. പദ്ധതിയുടെ ഭാഗമാകാൻ ആഗ്രഹിക്കുന്ന വ്യക്തികൾ, കുടുംബങ്ങൾ, സ്ഥാപനങ്ങൾ, ഗ്രൂപ്പുകൾ എന്നിവയ്ക്ക് ഉത്തരവാദിത്വ ടൂറിസം മിഷനിൽ രജിസ്റ്റർ ചെയ്യാം. ജനുവരി 30 വരെയാണ് രജിസ്‌ട്രേഷൻ സമയം. ഫോൺ: 0471 2334749, rt@keralatourism.org. ഫെബ്രുവരി 20നുള്ളിൽ പുതിയ പാക്കേജുകൾ പ്രഖ്യാപിക്കാനാണ് ഉദ്ദേശിക്കുന്നതെന്ന് സംസ്ഥാന ഉത്തരവാദിത്വ ടൂറിസം മിഷൻ കോ ഓർഡിനേറ്റർ കെ.രൂപേഷ് കുമാർ അറിയിച്ചു.