പെരിന്തൽമണ്ണ: കുട്ടികൾക്കായുള്ള രാജ്യത്തെ പ്രധാന പുരസ്‌കാരമായ പ്രധാനമന്ത്രി രാഷ്ട്രീയ ബാൽ പുരസ്‌കാരം നേടിയ അങ്ങാടിപ്പുറം ശ്രീലക്ഷി നിലയത്തിലെ മാസ്റ്റർ ദേവീപ്രസാദിനെ ഡി.വൈ.എഫ്.ഐ മങ്കട ബ്ലോക്ക് കമ്മിറ്റി അനുമോദിച്ചു.
കേരളത്തിൽ ദേവീപ്രസാദ് മാത്രമാണ് ഇത്തവണ രാഷ്ട്രീയ ബാൽ പുരസ്‌കാരത്തിന് അർഹനായത്. ആർട്ട് ആൻഡ് കൾച്ചറൽ വിഭാഗത്തിൽ മികച്ച മൃദംഗവാദ്യ കലാകാരനെന്ന അംഗീകാരത്തോടെയാണ് പുരസ്‌കാര ലബ്ധി. പ്രശസ്തി പത്രവും ഒരു ലക്ഷം രൂപയും അടങ്ങുന്നതാണ് പുരസ്‌കാരം. കേന്ദ്ര സർക്കാറിന്റെ പി.സി.സി.ആർ.ടി സ്‌കോളർഷിപ്പോടു കൂടി മൃദംഗവാദ്യപഠനം തുടരുന്ന ദേവീപ്രസാദ് മൃദംഗവാദ്യകലാകാരനും തിരുമാന്ധാംകുന്ന് ദേവസ്വം ക്ലാർക്കുമായ ദീപേഷിന്റെയും പൂപ്പലം അൽഫദക് ഇംഗ്ലീഷ് മീഡിയം സ്‌കൂൾ അദ്ധ്യാപികയായ പ്രസീതയുടെയും മകനാണ്. പുത്തനങ്ങാടി സെന്റ് ജോസഫ് ഇംഗ്ലീഷ് മീഡിയം സ്‌കൂളിൽ ഒൻപതാം ക്ലാസിലാണ് പഠിക്കുന്നത്. അനുമോദന ചടങ്ങിൽ ഡി.വൈ.എഫ്.ഐ മലപ്പുറം ജില്ലാ പ്രസിഡന്റ് കെ. ശ്യാംപ്രസാദ് ഉപഹാരം കൈമാറി. ജില്ലാ സെക്രട്ടറിയേറ്റ് അംഗം പി.കെ. ഷബീബ, ബ്ലോക്ക് പ്രസിഡന്റ് ആർ. രാഹുൽ, എം. ഷൈജേഷ്, സജിൻ ലാലു തുടങ്ങിയവർ പങ്കെടുത്തു.