പാലക്കാട്: നടൻ ഉണ്ണി മുകുന്ദന്റെ വീട്ടിൽ എൻഫോഴ്സ്‌മെന്റ് പരിശോധന. കോഴിക്കോട്,​ കൊച്ചി എന്നിവിടങ്ങളിൽ നിന്നുള്ള സംഘങ്ങൾ സംയുക്തമായാണ് ഒറ്റപ്പാലത്തെ വീട്ടിൽ പരിശോധന നടത്തിയത്. ചൊവ്വാഴ്ച രാവിലെ 11 ന് ആരംഭിച്ച പരിശോധന പകൽ മൂന്നുവരെ നീണ്ടു. ഉണ്ണി മുകുന്ദന്റെ പുതിയ സിനിമ മേപ്പടിയാൻ 14 ന് റിലീസ് ചെയ്യാനിരിക്കെയാണ് പരിശോധന.

താരത്തിന്റെ തന്നെ നിർമ്മാണ കമ്പനിയായ ഉണ്ണി മുകുന്ദൻ ഫിലിംസാണ് ചിത്രം നിർമ്മിക്കുന്നത്. മേപ്പടിയാന്റെ നിർമ്മാണവുമായി ബന്ധപ്പെട്ട് നടന്ന സാമ്പത്തിക ഇടപാടുകളാണ് എൻഫോഴ്സ്‌മെന്റ് പരിശോധിച്ചത് എന്നാണ് സൂചന. പരിശോധനയെകുറിച്ച് അധികൃതരും ഉണ്ണി മുകുന്ദനും കുടുംബവും പ്രതികരിച്ചിട്ടില്ല.