തിരുവല്ല : അഴിയിടത്തു ചിറയിൽ റോഡിൽ പരന്നൊഴുകിയ ഓയിലിൽ കയറി നിയന്ത്രണം വിട്ട് മറിഞ്ഞ് മൂന്ന് ബൈക്ക് യാത്രികർക്ക് പരിക്കേറ്റു. ടാങ്കറിൽ നിന്നും ചോർന്ന ഓയിൽ റോഡിൽ പരന്നൊഴുകിയതാണ് അപകടത്തിന് ഇടയാക്കിയത്. അപകടങ്ങളെ തുടർന്ന് അഗ്നി രക്ഷാ സേനയെത്തി റോഡ് കഴുകി വൃത്തിയാക്കി. കാവുംഭാഗം - ഇടിഞ്ഞില്ലം റോഡിൽ അഴിയിടത്തുചിറ ഇളയിടം ഭാഗത്തെ കൊടും വളവിൽ ഇന്നലെ പുലർച്ചെ ആറു മണിയോടെയാണ് സംഭവം. പുലർച്ചെ അഞ്ചരയോടെ കരി ഓയിൽ കയറ്റി ചങ്ങനാശേരി ഭാഗത്തേക്ക് പോയ ടാങ്കറിൽ നിന്നും ചോർന്ന ഓയിലാണ് അപകടങ്ങൾക്ക് കാരണമായത്. സംഭവമറിഞ്ഞ് തിരുവല്ലയിൽ നിന്നുമെത്തിയ അഗ്നി രക്ഷാ സേനാംഗങ്ങൾ ചേർന്ന് ആറരയോടെ റോഡ് കഴുകി വൃത്തിയാക്കി. അപകടത്തിൽപ്പെട്ട ആരുടെയും പരിക്ക് ഗുരുതരമല്ല.