ചെങ്ങന്നൂർ:അധിക പിന്തുണ ആവശ്യമുള്ള ഭിന്നശേഷി വിഭാഗം കുട്ടികൾക്കായി സമഗ്രശിക്ഷാ കേരളം ചെങ്ങന്നൂർ ബി.ആർ.സി യുടെ നേതൃത്വത്തിൽ സ്‌പെഷ്യൽ കെയർ സെന്ററുകൾ ആരംഭിക്കുന്നു. പദ്ധതിയുടെ സബ് ജില്ലാതല ഉദ്ഘാടനം ആല പഞ്ചായത്ത് പ്രസിഡന്റ് മുരളീധരൻ പിള്ള നിർവഹിച്ചു. ആല പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സജികുമാർ വി.എൻ അദ്ധ്യക്ഷത വഹിച്ചു. ചെങ്ങന്നൂർ ബ്ലോക്ക് പ്രോഗ്രാം കോർഡിനേറ്റർ ജി.കൃഷ്ണകുമാർ, ബി.ആർ.സി ട്രെയിനർ പ്രവീൺ വി.നായർ, എസ്.എം.സി ചെയർപേഴ്‌സൺ സീമ ശ്രീകുമാർ, ബി.ആർ.സി ട്രെയിനർ ബൈജു.കെ , ക്ലസ്റ്റർ കോർഡിനേറ്റർ ഹരിഗോവിന്ദ് .വി, പെണ്ണുക്കര ഗവ.യു.പി സ്‌കൂൾ പ്രഥമാദ്ധ്യാപിക പി.എസ് ശ്രീകുമാരി എന്നിവർ പ്രസംഗിച്ചു.
അക്കാദമിക പിന്തുണയോടൊപ്പം വ്യക്തിഗതമായ അധിക പിന്തുണാസംവിധാനം എന്ന നിലയിലാണ് എല്ലാ പഞ്ചായത്തുകളിലും മുൻസിപ്പാലിറ്റിയിലും സ്‌പെഷ്യൽ കെയർ സെന്ററുകൾ ആരംഭിക്കുന്നത്. ഓരോ കുട്ടിയുടെയും വൈകല്യത്തിന്റെ സ്വഭാവമനുസരിച്ചുള്ള പഠനോപകരണങ്ങൾ ഉപയോഗിച്ച് പരിശീലനം നൽകും. നിലവിൽ ഓട്ടിസം സെന്റർ കേന്ദ്രീകരിച്ച് നൽകുന്ന വിവിധ തെറാപ്പി സേവനങ്ങളും എല്ലാ പ്രദേശത്തെയും കുട്ടികളിലേക്ക് എത്തിക്കുന്നതിന് സ്‌പെഷ്യൽ കെയർ സെന്ററുകൾ സഹായകരമാകും. ഭിന്നശേഷി വിഭാഗം കുട്ടികളുടെ രക്ഷിതാക്കൾക്ക് ബോധവത്കരണം, നൈപുണിവികസന പരിപാടികൾ, തൊഴിൽ പരിശീലനം എന്നിവയ്ക്കും സ്‌പെഷ്യൽ കെയർ സെന്ററുകൾ നേതൃത്വം നൽകും.