റാന്നി : വെച്ചൂച്ചിറ കൂത്താട്ടുകുളം ജല വിതരണ പൈപ്പ് സ്ഥാപിക്കുന്ന കിഫ്ബിയുടെ പ്രവർത്തനം മാർച്ച് 31നകം പൂർത്തിയാക്കും. വാട്ടർ അതോറിറ്റി ഉന്നതതല ഉദ്യോഗസ്ഥരുടെയും കരാറുകാരന്റെയും യോഗത്തിലാണ് തീരുമാനം. വേനൽക്കാലമാകുന്നതോടെ കടുത്ത കുടിവെള്ളക്ഷാമം അനുഭവപ്പെടുന്ന വെച്ചൂച്ചിറയിൽ എത്രയും വേഗം ജലവിതരണ പൈപ്പുകൾ സ്ഥാപിച്ച് കുടിവെള്ള ലഭ്യത ഉറപ്പാക്കണമെന്ന പ്രമോദ് നാരായൺ എം.എൽ.എയുടെ നിർദ്ദേശത്തെ തുടർന്നാണ് അടിയന്തര യോഗം വിളിച്ചത്. മഠത്തുംചാൽ , മുക്കൂട്ടുതറ റോഡ് നിർമ്മാണവുമായി ബന്ധപ്പെട്ട് പെരുന്തേനരുവി കുടിവെള്ള പദ്ധതിയുടെ ചേത്തയ്ക്കൽ മുതൽ കൂത്താട്ടുകുളം വെച്ചൂച്ചിറ വരെയുള്ള പൈപ്പ് ലൈനുകൾ തകർന്നു പോയിരുന്നു. ഇവ മാറ്റിസ്ഥാപിക്കുന്നതിന് കിഫ്ബി മുഖേന 4.7 കോടി രൂപ അനുവദിച്ചു.
നിലവിൽ 90 എം.എം ന്റെ 1000 മീറ്റർ പി.വി.സി പൈപ്പും 180 എം.എം ന്റെ 1100 മീറ്റർ ഡി.ഐ പൈപ്പുകളും ഇതുവരെ വിതരണം ചെയ്തു. ഫെബ്രുവരി പത്തിനകം പൈപ്പുകൾ മുഴുവൻ വിതരണം ചെയ്യും. പത്തനംതിട്ട പി.എച്ച് സർക്കിൾ സൂപ്രണ്ടിംഗ് എൻജിനീയർ ഉഷാ രാധാകൃഷ്ണൻ , അസി. എക്‌സിക്യൂട്ടീവ് എൻജിനീയർ ദിലീപ് ഗോപാൽ , എൻജിനീയർ മിനി ജേക്കബ് ,മിനാർ മാനേജിംഗ് ഡയറക്ടർ എം. ലത്തീഫ് എന്നിവർ പങ്കെടുത്തു.