കോഴഞ്ചേരി: ഗാന്ധിജിയുടെ ആറന്മുള സന്ദർശന 85-ാം വാർഷികത്തിന്റെ ഭാഗ​മായി ഒരു വർഷക്കാലം നീണ്ടു നിൽക്കുന്ന ഖാദി പ്രചാരണത്തിന് തുടക്കം കുറിച്ചു. ദേശീയതയും ഖാദിയുമായുള്ള ബന്ധം പുതുതലമുറയിൽ എത്തിക്കുക ലക്ഷ്യമാക്കി ഖാദി ഉൽപ്പാദക വിപണന സഹകരണ സംഘമായ ക്രീഡിന്റെ ആഭിമുഖ്യത്തിലാണ് പ്ര​ചാരണ വർഷം സംഘടിപ്പിച്ചിരിക്കു​ന്ന​ത്. ആറന്മുളയിൽ നടന്ന സമ്മേളനം ഡോ.ജോസ് പാറക്കടവിൽ ഉദ്ഘാടനം ചെയ്തു. ഗാന്ധിജിയെ 85വർഷം മുൻപ് ഇലന്തൂരിൽ സ്വീകരിച്ച ഉടയൻകാവിൽ കെ.മീനാക്ഷിയമ്മക്ക് ക്രീഡ് സഹകരണ സംഘം പ്ര​സിഡന്റ് ടി.ജെ.ഹരികുമാർ ഖാദി വസ്ത്രങ്ങൾ കൈമാറി പ്രചാരണത്തിന് തുടക്കം കു​റിച്ചു. സെക്രട്ടറി പോൾരാജ്, മാർക്കറ്റിംഗ് മാനേജർ ടി.ആർ.സനിൽ തുടങ്ങിയവർ പ്രസംഗിച്ചു.