ചെങ്ങന്നൂർ: സമഗ്രശിക്ഷാ കേരളം ചെങ്ങന്നൂർ ബി.ആർ.സി.യുടെ നേതൃത്വത്തിൽ പെൺകുട്ടികൾക്കുള്ള സ്വയം പ്രതിരോധ പരിശീലന പരിപാടി സംഘടിപ്പിക്കുന്നു. തിരഞ്ഞെടുക്കപ്പെട്ട സർക്കാർ വിദ്യാലയങ്ങളിലെ ഏഴു മുതൽ പ്ലസ്ടു വരെയുള്ള ക്ലാസുകളിലെ പെൺകുട്ടികൾക്ക് കളരിപ്പയറ്റ്, കരാട്ടെ, കുങ്ഫു, ജൂഡോ, എയ്രോബിക്‌​സ്, നീന്തൽ തുടങ്ങിയ ഇനങ്ങളിൽ സ്‌​പോർട്‌​സ് കൗൺസിൽ അംഗങ്ങളായ വിദഗ്ദ പരിശീലകർ ക്ലാസുകൾ നൽകും. പരിശീലനത്തിൽ പങ്കെടുക്കുന്ന കുട്ടികൾക്ക് പ്രചോദനമാകുംവിധം ഈ മേഖലകളിൽ പ്രഗത്ഭരായ പ്രാദേശിക സ്ത്രീപരിശീലകരെയും പദ്ധതിയിൽ ഉൾപ്പെടുത്തിയിരിക്കുന്നു. സ്വയം സുരക്ഷിതത്വം ഉറപ്പാക്കി ആത്മവിശ്വാസത്തോടെ മുന്നേറുവാനുള്ള ഊർജ്ജമാണ് ഇതിലൂടെ പെൺകുട്ടികൾക്ക് നൽകുന്നത്.
പുലിയൂർ ഗവ.ഹയർസെക്കൻഡറി സ്​കൂളിലെ പെൺകുട്ടികൾക്കുള്ള കളരിപ്പയറ്റ് പരിശീലനത്തിലൂടെ പദ്ധതിയ്ക്ക് ഉപജില്ലാതലത്തിൽ തുടക്കമായി. മാന്നാർ കളരി പരിശീലകനും, സാംസ്​കാരികവകുപ്പിന്റെ വജ്രജൂബിലി ഫെലോഷിപ്പ് ജേതാവുമായ കെ.ആർ.രദീപിന്റെ നേതൃത്വത്തിലാണ് പരിശീലനം നടക്കുന്നത്. പുലിയൂർ പഞ്ചായത്ത് പ്രസിഡന്റ് എം.ജി.ശ്രീകുമാർ ഉദ്ഘാടനം ചെയ്തു. ചെങ്ങന്നൂർ ബ്ലോക്ക് പഞ്ചായത്ത് വൈസ് പ്രസിഡന്റ് സുജ രാജീവ് ,ചെങ്ങന്നൂർ ബ്ലോക്ക് പ്രോഗ്രാം കോ​ഓർഡിനേറ്റർ ജി.കൃഷ്ണകുമാർ, കെ.ബൈജു, പ്രവീൺ വി.നായർ,വി.ഹരിഗോവിന്ദ്, കെ.വി. മൃദുല എന്നിവർ പ്രസംഗിച്ചു. ചടങ്ങിൽ വിദ്യാർത്ഥിനി ലക്ഷ്മി ഭാസിയുടെ നേതൃത്വത്തിൽ കുട്ടികളുടെ കളരി അഭ്യാസപ്രകടനം നടത്തി.