കൊല്ലം :കേന്ദ്രത്തിന്റെ പെറ്റ് ഷോപ്പ് നിയമങ്ങൾ പ്രായോഗികതയോടെ നടപ്പിലാക്കാൻ സാംസ്ഥാന മൃഗ ക്ഷേമ ബോർഡ് രൂപീകരിച്ചിട്ടുണ്ടെന്ന് മന്ത്രി ചിഞ്ചുറാണി പറഞ്ഞു.കൊട്ടിയത്ത് മൃഗസംരക്ഷണ വകുപ്പ് സംഘടിപ്പിച്ച മൃഗക്ഷേമ ബോധവത്കരണ സെമിനാർ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.

അയ്യായിരത്തോളം അരുമ മൃഗ പക്ഷി വില്‌പന കേന്ദ്രങ്ങൾ സംസ്ഥാനത്തുണ്ട്. ഷോപ്പുകളുടെ രജിസ്ട്രേഷനുമായി ബന്ധപ്പെട്ട് നിരവധി കർശന നിർദ്ദേശങ്ങളും ചട്ടങ്ങളും കേന്ദ്ര നിയമത്തിലുണ്ട്. സംസ്ഥാന മൃഗ ക്ഷേമ ബോർഡിനാണ് രജിസ്ട്രേഷൻ നല്കുന്നതിനുള്ള അധികാരം. ബോർഡിന്റെ ശുപാർശകൾ കൂടി പരിഗണിച്ച് സംരംഭകർക്ക് ബുദ്ധിമുട്ടില്ലാത്ത തരത്തിൽ രജിസ്ട്രേഷൻ പൂർത്തിയാക്കുമെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡണ്ട് സാം കെ. ദാനിയേൽ അദ്ധ്യക്ഷനായിരുന്നു. മികച്ച ക്ഷേമ പ്രവർത്തകയ്ക്കുള്ള 10,000 രൂപയുടെ പുരസ്കാരം പുത്തൂർ അമ്മാലയത്തിൽ ജയയ്ക്ക് മന്ത്രി സമ്മാനിച്ചു. മൃഗക്ഷേമ ബോർഡംഗം ഹണി ബഞ്ചമിൻ പരിശീലനകിറ്റ് നല്കി. ബ്ലോക്ക് പഞ്ചായത്ത് പ്രസിഡന്റ് എൻ.സദാനന്ദൻ പിള്ള, ജില്ലാ പഞ്ചായത്തംഗം ശ്രീജ ഹരീഷ്, ജില്ലാമൃഗ സംരക്ഷണ ഓഫീസർ ഡോ.സുജ ടി.നായർ, ചീഫ് വെറ്ററിനറി ഓഫീസർ ഡോ. ഡി.എസ്.ബിന്ദു, ഡോ.എസ് പ്രിയ, ഡോ.ഡി. ഷൈൻ കുമാർ, ഡോ. കെ.എസ്. സിന്ധു എന്നിവർ സംസാരിച്ചു.