കൊല്ലം: പുതുവർഷ തലേന്ന് പട്രോളിംഗ് ഡ്യൂട്ടിയിലായിരുന്ന പൊലീസ് ഉദ്യോഗസ്ഥരെ ആക്രമിച്ച സംഘത്തിലെ ഒരാളെക്കൂടി കണ്ണനല്ലൂർ പൊലീസ് പിടികൂടി. കണ്ണനല്ലൂർ ചേരിക്കോണം ചിറയിൽ കോളനിയിൽ ചിറയിൽ വീട്ടിൽ മണിക്കുട്ടൻ (23) ആണ് പിടിയിലായത്.

സിവിൽ പോലീസ് ഉദ്യോഗസ്ഥരായ സുധീർ, സിയാദ് എന്നിവരാണ് ആക്രമിക്കപ്പെട്ടത്. പൊലീസ് സംഘം കോളനി പരിസരത്ത് നടത്തിയ രാത്രികാല പരിശോധന തടഞ്ഞ് ആക്രമിക്കുകയായിരുന്നു. തുടർന്ന് കണ്ണനല്ലൂർ പൊലീസ് സ്റ്റേഷനിൽ നിന്നു ഇൻസ്‌പെക്ടറുടെ നേതൃത്വത്തിൽ കൂടുതൽ പൊലീസുകാർ സ്ഥലത്തെത്തിയപ്പോൾ കല്ലെറിഞ്ഞു. സംഭവ സ്ഥലത്ത് നിന്നു ശരത്ത് എന്നയാളെ അന്നുതന്നെ പിടികൂടിയിരുന്നു. ഒളിവിലായിരുന്ന മണിക്കുട്ടനെ കണ്ണനല്ലൂർ ഇൻസ്‌പെക്ടർ യു.പി. വിപിൻകുമാറിന്റെ നേതൃത്വത്തിൽ എസ്.ഐ സജീവ്, എ.എസ്.ഐമാരായ ഹരിസോമൻ, ബിജു, സി.പി.ഒ മാരായ സിയാദ്, സുധീർ, ചന്തു എന്നിവരടങ്ങിയ സംഘമാണ് പിടികൂടിയത്.