കൊട്ടാരക്കര: വെട്ടിക്കവല ചിരട്ടക്കോണത്ത് ടോറസ് ലോറി ഇടിച്ച് ബൈക്ക് യാത്രികരായ ദമ്പതികളിൽ ഭർത്താവ് മരിച്ചു, ഭാര്യയ്ക്ക് ഗുരുതര പരിക്ക്. കോക്കാട് പുള്ളിപ്പാറ മനോജ് ഭവനിൽ വിജയമോഹനൻപിള്ളയുടെയും ഭാനുമതിഅമ്മയുടെയും മകനായ മനോജ് (45) ആണ് മരിച്ചത്. ഇന്നലെ രാവിലെ 11മണിക്കായിരുന്നു അപകടം. ഭാര്യ ജയയെ (37) തിരുവനന്തപുരം മെഡിക്കൽ കോളജിൽ പ്രവേശിപ്പിച്ചു.
ചെങ്ങമനാട് നിന്ന് വാളകം ഭാഗത്തേക്ക് പോകുകയായിരുന്ന ടോറസ് ലോറി അമിത വേഗതയിൽ തെറ്റായ ദിശയിൽ വന്ന് ബൈക്കിൽ ഇടിക്കുകയായിരുന്നെന്ന് ദൃക്‌സാക്ഷികൾ പറയുന്നു. ടിപ്പർ ഡ്രൈവർ ഓടി രക്ഷപ്പെട്ടു. ആംബുലൻസ് എത്താൻ വൈകിയത് കാരണം പരിക്കേറ്റ ദമ്പതികൾ അരമണിക്കൂറോളം റോഡിൽകിടന്നതായി നാട്ടുകാർ പറഞ്ഞു. കിളിമാനൂരിലെ റെസ്റ്റോറന്റ് ജീവനക്കാരനാണ് മനോജ്. മക്കൾ: അഭിജിത്, നിജ. കൊട്ടാരക്കര പൊലീസ് മേൽ നടപടികൾ സ്വീകരിച്ചു.