ഒല്ലൂർ: പാലിയേക്കര ടോൾ പ്ലാസ മുതൽ വാണിയമ്പാറ വരെ ദേശീയപാതയിൽ സി.സി.ടി.വി ശൃംഖല തീർക്കുമെന്ന് റവന്യൂമന്ത്രി കെ. രാജൻ. ഒല്ലൂർ പൊലിസ് സ്റ്റേഷന്റെ ചുറ്റുമതിൽ ഉദ്ഘാടനം നിർവഹിക്കുകയായിരുന്നു മന്ത്രി. ദേശീയപാതയിൽ സി.സി.ടി.വി ശൃംഖല രൂപീകരിക്കുന്നതോടെ ജനങ്ങളുടെ സുരക്ഷിതത്വം ഉറപ്പാക്കാൻ കഴിയും. മണ്ണുത്തി പൊലിസ് സ്റ്റേഷൻ സി.സി.ടി.വി ശൃംഖലയുടെ പ്രധാന ഹബ്ബായി പ്രവർത്തിക്കും. പുത്തൂർ സുവോളജിക്കൽ പാർക്ക് യാഥാർത്ഥ്യമാകുമ്പോൾ വിനോദ സഞ്ചാരികളുടെ എണ്ണം വർദ്ധിക്കുകയും പ്രധാന ടൂറിസ്റ്റ് കേന്ദ്രമായി മാറുകയും ചെയ്യും. പുത്തൂർ കേന്ദ്രീകരിച്ച് പുതിയ പൊലിസ് സ്റ്റേഷൻ തുടങ്ങാനുള്ള നടപടികൾ ഉടൻ സർക്കാരിന്റെ ഭാഗത്ത് നിന്ന് ഉണ്ടാകും. എം.എൽ.എ ആസ്തി വികസന ഫണ്ടിൽ നിന്ന് 25 ലക്ഷം രൂപ വിനിയോഗിച്ചാണ് ഒല്ലൂർ പൊലിസ് സ്റ്റേഷന്റെ ചുറ്റുമതിൽ നിർമ്മിച്ചത്. സ്റ്റേഷൻ പരിസരത്ത് നടന്ന പരിപാടിയിൽ മേയർ എം.കെ. വർഗീസ് അദ്ധ്യക്ഷനായി. തൃശൂർ ജില്ലാ പൊലിസ് മേധാവി ആർ. ആദിത്യ, കോർപറേഷൻ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ വർഗീസ് കണ്ടംകുളത്തി, ഡിവിഷൻ കൗൺസിലർ കരോളിൻ ജെറീഷ്, സ്‌പെഷ്യൽ ബ്രാഞ്ച് എ.സി.പി ഗോപാലകൃഷ്ണൻ, ഒല്ലൂർ എസ്.ഐ ബിപിൻ.പി.നായർ, ഒല്ലൂർ സബ് ഡിവിഷൻ എ.സി.പി കെ.സി. സേതു, ഇൻസ്‌പെക്ടർ ബെന്നി തുടങ്ങിയവർ പങ്കെടുത്തു.