ഒല്ലൂർ: കനിവ് 108 ആംബുലൻസ് ജീവനക്കാരുടെ പരിചരണത്തിൽ അന്യസംസ്ഥാന തൊഴിലാളിയായ യുവതിക്ക് വീട്ടിൽ സുഖപ്രസവം. കൊൽക്കത്ത സ്വദേശിനി തൃശൂർ മരത്താക്കര ഗാന്ധിനഗറിൽ താമസിക്കുന്ന അബിഘോഷിന്റെ ഭാര്യ ജൂലി (23) ആണ് വീട്ടിൽ ആൺകുഞ്ഞിന് ജന്മം നൽകിയത്. ബുധനാഴ്ച രാത്രി 6.45 ന് ജൂലിക്ക് പ്രസവവേദന അനുഭവപ്പെട്ടപ്പോൾ ഒപ്പമുണ്ടായിരുന്നവർ കനിവ് 108 ആംബുലൻസിന്റെ സേവനം തേടുകയായിരുന്നു. ഉടൻ കൺട്രോൾ റൂം എമർജൻസി റെസ്‌പോൺസ് ഓഫീസർ അർച്ചന അത്യാഹിത സന്ദേശം തൃശൂർ ജനറൽ ആശുപത്രിയിലെ കനിവ് 108 ആംബുലൻസിന് കൈമാറി. ആംബുലൻസ് പൈലറ്റ് പി.എസ്. സിജി, എമർജൻസി മെഡിക്കൽ ടെക്‌നീഷ്യൻ പി.എം. വിഷ്ണു എന്നിവർ സ്ഥലത്തെത്തി. വിഷ്ണുവിന്റെ പരിശോധനയിൽ ജൂലിയെ ആംബുലൻസിലേക്ക് മാറ്റാൻ കഴിയാത്ത സ്ഥിതിയെന്ന് മനസിലാക്കി വീട്ടിൽ തന്നെ പ്രസവം നടത്താൻ വേണ്ട സജ്ജീകരണങ്ങൾ ഒരുക്കി. വിഷ്ണുവിന്റെ പരിചരണത്തിൽ 7.15 ന് ജൂലി ആൺകുഞ്ഞിന് ജന്മം നൽകി. പൊക്കിൾ കൊടി ബന്ധം വേർപ്പെടുത്തി പ്രഥമ ശുശ്രൂഷ നൽകിയ ശേഷം അമ്മയെയും കുഞ്ഞിനെയും ആംബുലൻസിലേക്ക് മാറ്റി. ആംബുലൻസ് പൈലറ്റ് സിജി ഇരുവരെയും ഉടൻ തൃശൂർ ജനറൽ ആശുപത്രിയിൽ എത്തിച്ചു. അമ്മയും കുഞ്ഞും സുഖമായി ഇരിക്കുന്നതായി ബന്ധുക്കൾ അറിയിച്ചു.