ചാവക്കാട്: ചരിത്ര പ്രസിദ്ധമായ മണത്തല ചന്ദനക്കുടം നേർച്ചയ്ക്ക് ഇന്ന് കൊടിയേറും. രാവിലെ 9.30 ന് മക്കാം സിയാറത്തിന് ശേഷം കൊടിയേറ്റം നടക്കും. മണത്തല ജുമാഅത്ത് കമ്മിറ്റി പ്രസിഡന്റ് പി.എസ്. ഷാഹു സാഹിബ് കൊടി ഉയർത്തും. സെക്രട്ടറി എ.വി. അഷറഫ്, ട്രഷറർ എ.പി.ഷഹീർ, വൈസ് പ്രസിഡന്റുമാരായ എൻ.കെ.സുധീർ, ടി.പി. കുഞ്ഞിമുഹമ്മദ്, ജോയിന്റ് സെക്രട്ടറിമാരായ കുഞ്ഞിൻ ഹാജി, മൊയ്തീൻ ഷാ എന്നിവർ നേതൃത്വം നൽകും. മുദരിസ് അബ്ദുല്ലത്തീഫ് ദാരിമി അൽ ഹൈതമി, ഖത്തീബ് കമറുദ്ദിൻ ബാദുഷ തങ്ങൾ എന്നിവർ പ്രാർത്ഥനയ്ക്ക് നേതൃത്വം നൽകും. തുടർന്ന് നേർച്ചയുടെ വരവറിയിച്ച് മുട്ടുംവിളി ആരംഭിക്കും. സാമൂതിരി രാജാവിന്റെ പടത്തലവനായിരുന്ന നാലകത്ത് ചാന്ദിപുറത്ത് ഹൈദ്രോസ്‌കുട്ടി മൂപ്പരുടെ ധീരസ്മരണയിൽ ആഘോഷിക്കുന്ന 234-ാമത് ആണ്ട് നേർച്ച കൊവിഡ് നിയന്ത്രണങ്ങൾ പാലിച്ച് ജനുവരി 28, 29 തീയതികളിലാണ് ആഘോഷിക്കുക. ചാവക്കാട് പഴയപാലം താബൂത്ത് ആഘോഷ കമ്മിറ്റിയുടെ ആഭിമുഖ്യത്തിൽ വൈകിട്ട് ഏഴിന് താബൂത്ത് അലങ്കരിച്ചൊരുക്കുന്നതിനായി കൊണ്ടുപോകും. ദഫ്മുട്ടിന്റെയും മുട്ടുംവിളിയുടെയും അകമ്പടിയോടെ നഗരം ചുറ്റി താബൂത്ത് പഴയപാലത്തിന് സമീപം സജ്ജീകരിച്ചിരിക്കുന്ന പന്തലിൽ എത്തിക്കും. തുടർന്ന് നേർച്ച ആഘോഷ ദിനമായ 29ന് താബൂത്ത് കാഴ്ചയുമായി ഉച്ചയ്ക്ക് 12 ന് ജാറത്തിൽ എത്തിച്ചേരും.