തിരുവനന്തപുരം: കണ്ടക്‌ടർമാർക്ക് ബൂസ്റ്റർ ഡോസ് വാക്‌സിൻ നൽകാൻ സ്‌പെഷ്യൽ ഡ്രൈവ് സംഘടിപ്പിക്കണമെന്ന് ആരോഗ്യ വകുപ്പിനോട് കെ.എസ്.ആർ.ടി.സി ആവശ്യപ്പെട്ടു. ഇതിനുളള ക്രമീകരണങ്ങൾ നടന്നുവരികയാണെന്ന് കെ.എസ്.ആർ.ടി.സി സി.എം.ഡി ബിജു പ്രഭാകർ അറിയിച്ചു. സ്‌കൂൾ വിദ്യാർത്ഥികൾക്ക് വാക്‌സിനേഷൻ നടക്കുന്നത് കാരണം ഡിപ്പോകളിൽ വാക്‌സിനേഷൻ ക്യാമ്പ് നടത്താനുള്ള ബുദ്ധിമുട്ട് ആരോഗ്യവകുപ്പ് അറിയിച്ചതിനെ തുടർന്ന് ഓരോ ആശുപത്രികളിലും വാക്‌സിനേഷൻ നടത്താനാണ് ശ്രമം.
സംസ്ഥാനത്ത് 3431 ബസുകളാണ് ഇന്നലെ സർവീസ് നടത്തിയത്. 1388 ബസുകൾ തിരുവനന്തപുരത്ത് മാത്രം സർവീസ് നടത്തി. സർവീസുകൾ നിറുത്തലാക്കി അവധി നേടുന്നതിന് വേണ്ടി ഒരു വിഭാഗം ജീവനക്കാരാണ് വ്യാജ പ്രചരണത്തിന് പിന്നിലെന്ന് ബിജു പ്രഭാകർ ആരോപിച്ചു.