തിരുവനന്തപുരം:മോട്ടോർ സൈക്കിളിൽ കറങ്ങി മദ്യ വിൽപ്പന പതിവാക്കിയ യുവാവിനെ എക്സൈസ് അറസ്റ്റ് ചെയ്തു.നെടുമങ്ങാട് പുല്ലമ്പാറ പാലം ജംഗ്ഷനിൽ കുന്നിക്കോട് പുത്തൻവീട്ടിൽ റഫീക്കിനെയാണ് (38)​ അറസ്റ്റ് ചെയ്തത്.പ്രതിയിൽ നിന്നും 24 കുപ്പി വിദേശമദ്യവും 4500രൂപയും പിടിച്ചെടുത്തു.വാമനപുരം എക്സൈസ് റേഞ്ച് ഓഫീസിലെ പ്രിവന്റീവ് ഓഫീസർ ബിനു താജുദീനും സംഘവും നടത്തിയ പരിശോധനയിലാണ് പിടിയിലായത്.വൈദ്യൻ കാവിലേയ്ക്ക് പോകുന്ന റോഡിൽ തമിഴ്നാട് രജിസ്ട്രേഷൻ മോട്ടോർ സൈക്കിളിൽ കറങ്ങിനടന്ന് മദ്യ വില്പന നടത്തുകയായിരുന്നു. പുല്ലമ്പാറയിലും പരിസരപ്രദേശങ്ങളിലും ആവശ്യക്കാർ ഫോണിൽ ബന്ധപ്പെടുമ്പോൾ മദ്യം എത്തിച്ചു കൊടുക്കുകയാണ് ചെയ്തിരുന്നത്. ബിവറേജ് ഷോപ്പിൽ നിന്നും വാങ്ങുന്ന മദ്യം 150 മുതൽ 200 രൂപവരെ വില കൂട്ടിയാണ് വിറ്റിരുന്നത്. അറസ്റ്റിലായ ഇയാൾക്ക് കൊവിഡ് സ്ഥിരീകരിച്ചെങ്കിലും കോടതിയിൽ ഹാജരാക്കി റിമാൻഡ് ചെയ്തു.