തിരുവനന്തപുരം: റിപ്പബ്ലിക് ദിനാഘോഷത്തിന്റെ ഭാഗമായി നാളെ സെൻട്രൽ സ്റ്റേഡിയത്തിൽ നടക്കുന്ന പരേഡിനോടനുബന്ധിച്ച് വിപുലമായ സുരക്ഷാ ക്രമീകരണം നഗരത്തിൽ ഏർപ്പെടുത്തിയതായി സിറ്റി പൊലീസ് കമ്മീഷണർ ജി.സ്പർജൻകുമാർ അറിയിച്ചു നാല് സോണുകളായി തിരിച്ചാണ് സുരക്ഷയൊരുക്കുന്നത്. ഓരോ സോണിന്റെയും മേൽനോട്ട ചുമതല അസി.കമ്മീഷണർമാർക്കായിരിക്കും.ഒാരോ സോണിലും 2 സെക്ടറുകൾ ഉണ്ടാകും.സെക്ടറുകളിൽ ഇൻസ്‌പെക്ടർമാരുടെ നേതൃത്വത്തിൽ സ്റ്റേഡിയത്തിനകത്തും പുറത്തുമായി 200 പൊലീസുകാരെ വിന്യസിക്കും. നഗരത്തിലെ പ്രധാന സ്ഥലങ്ങൾ കേന്ദ്രീകരിച്ച് ഏഴ് സ്‌പെഷ്യൽ സ്‌ട്രൈക്കിംഗ് ഫോഴ്സുകളും ഏർപ്പെടുത്തിയിട്ടുണ്ട്.സർക്കാർ ക്ഷണിക്കപ്പെട്ടിട്ടുള്ള നൂറ് അതിഥികൾ ഒഴികെ, മറ്റു പൊതു ജനങ്ങൾക്ക് സ്റ്റേഡിയത്തിൽ പ്രവേശനം അനുവദിക്കുന്നതല്ല. ഡെപ്യൂട്ടി കമ്മീഷണർ അങ്കിത് അശോകനായിരിക്കും റിപ്പബ്ലിക് ദിന സുരക്ഷാ ക്രമീകരണങ്ങളുടെ പൂർണ്ണ ചുമതലയെന്നും സിറ്റി പൊലീസ് കമ്മീഷണർ ജി. സ്പർജൻകുമാർ അറിയിച്ചു.